Debate di idea y proposion on pa mehor'e y sigur'e si ta na su luga! 

Un discucion franco cu idea y proposicionnan realistico riba con pa fortifica y mehora e fondo di pensioen ta na su luga. Pero no un discucion den estilo di acusacion manera nos a wak e partido MEP ta haci. Ariba e posicion inconsistente y peligroso cu MEP ta asumi, tin mas pa bisa y corrigi.

FALTA DI ACCION
Den su conseho como inspector di belasting y actual lider di MEP a propone na 2002 caba pa hisa e edad di pensioen pa 65 aña. Ela propone pa haci e cambio grandi aki den seis aña. Den e plan di e lider di MEP tur hende lo a bay cu pensioen na edad 65 aña ya for di prome di januari 2012. E inspector di belasting y actual lider di MEP, a usa diferente motibo pa propone ya na 2002 pa hisa e edad di pensioen na 65 aña. Den su conseho na gobierno e ta menciona entre otro e motibonan aki: e crecemento lihe di e cantidad di hende cu ta bay cu pensioen, e cantidad di trahado cu tin cu paga e prima cu ta bahando lihe. Cu esey e kier men cu e entradanan di e fondo ta sigui baha y e cantidad di hende cu mester cobra nan pensioen ta sigui subi. E mes un motibonan ta conta awe ainda. Pero gobierno di MEP a haci mucho tiki y a laga e situacion di e fondo empeora.

Den e plan di partido AVP di 2004, a propone pa haci diferente cambio den e structura y organisacion di e fondo di pensioen di behez, pero pa tene e edad na 60 aña. Na 2004 esey tabata posibel ainda. Ta pesey ta asina tristo cu gobierno di MEP no a tuma accion ya for di 2002.   Na 2002 ya tabata tin tur conseho, tur informacion cu e cantidad di hende cu ta bay cu pensioen  ta aumento rapido y cu e fondo no lo por gargu'e si no restructura e fondo. Na 2002 ya tabata conoci cu e cantidad di trahado cu mester paga e prima tabata bahanado. E conseho di e inspector di belasting y actual lider di MEP mes ta menciona esaki como motibo pa actua. Pero gobierno di MEP a haci practicamente nada! Si na 2002 gobierno di MEP lo a tuma e consehonan y actua, of si nan lo a tuma e plan di AVP na 2004 y us'e, ainda lo por a tene e edad di pensioen abou pa mas tempo. Na 2007 Banco di Seguro Social (SvB) a raporta cu e fondo a cuminsa conoce deficitnan grandi. Ya na 2007 e deficit tabata di 9.4miyon. Si no a haci nada e deficitnan lo a sigui subi te na 39.9 miyon na 2012. Gobierno di MEP no a actua cu suficiente diligencia y a haci mucho tiki pa salba e fondo.

ACCION PA SALBA E FONDO
Ta pesey na 2010 ya caba gobierno di AVP a cuminsa tuma accion pa salba e fondo. A tuma desicion pa restructura e entradanan di e fondo cu pa hopi aña caba no tabata sufuciente pa cubri e gastonan di e pensioen. A hisa e prima y a hisa e nivel di entrada cu mester paga prima. A haci tur esaki pa mehora e entradanan di e fondo. Ora tur esaki no a yuda suficiente pasobra a tarda for di 2002, mester a dicidi di aumenta e edad di pensioen den forma gradual den 10 aña. Cu tur e accionnan pa salba e fondo, awe e fondo ta stabil y otro aña e ta cuminsa crea reservanan atrobe. Di e forma aki e fondo di AOV por sigui sigura e entrada di tur e pensionadonan actual y di tur e trahadornan cu bay cu pensioen den e 10 pa 20 aña cu ta bin. Rene Herde' di partido AVP a declara riba e tema aki lo siguiente: "E entrada di mas cu 20 mil pensionado awe y 35 mil pensionado na 2030 ta depende di e fondo di pensioen aki como nan entrada principal. MEP no a actua den gobierno pa salba e fondo di pensioen. Den parlamento MEP a vota contra pa salba e fondo y entrada di 20 mil pensionado. Anto ta net MEP kier bisa cu nan ta na fabor di e trahado y e pensionado? Nan palabranan y nan accionnan no ta cuadra. Nos ta na fabor di un discucion cu ideanan realistico pa cuida y fortifica e fondo, pero no pa haci wega politico cun'e."

Expresionnan haci den e articulo aki no necesariamente ta refleha opinion di ArenaPoliti.co