MEP: ‘Locual Melvin no kier splica pueblo: Den 7 aña Gabinete Eman a aumenta e suma di pensioen di esnan casa cu un miserabel 6 florin y di soltero cu 4 florin’
E siman cu a pasa parlamentario Melvin Tromp di AVP den un acto di desesperacion a ataca partido MEP bisando cu despues di 15 aña MEP y su lider kier corda riba nos pensionadonan. Sin duda cu e consenshi di Melvin Tromp a cuminsa remorde mirando con durante e ultimo 7 añanan su gobierno a masacra e grupo di pensionadonan den un forma nunca visto. Pues ta na su lugar pa partido MEP un biaha mas recorda Melvin Tromp riba tur e abusonan cu su gobierno a comete contra nos pensionadonan.
Pensionadonan perhudica
- Durante e ultimo 7 añanan Gabinete Eman a hinca nos pensionadonan den miseria total ya cu – apesar di un aumento explosivo di costo di bida – e pensioen di biehes (AOV) di esnan casa a ser aumenta cu un averahe di apenas 6 florin pa aña y di esnan soltero cu un miserabel 4 florin. Melvin Tromp, abo y bo gobierno no tin ningun tiki di berguensa? Echo ta cu tempo di Gabinete Oduber e aumento den averahe tabata 33 florin pa esnan casa y 20 florin pa esnan soltero. Y tur esaki a bin despues cu e propio gobierno di AVP a aumenta e prima di AOV cu 1% na 2014 y cu 1% na 2015. Pues Gabinete Eman a hinca man den cartera di tur trahador na Aruba y pa despues duna un limosna na e pensionadonan.
- Pensionadonan cu debi na costo di bida halto a dicidi di sigui traha a conoce un aumento di salario minimo di apenas 19 florin pa aña, siendo cu bao di Gabinete Oduber e aumento tabata 54 florin pa aña. Compara y mira e diferencia!
- Gabinete Eman a individualisa e prima di AOV pa e pensionadonan cu ta casa. Esaki a trece cu ne cu entrante 2011 e pensionadonan cu tabata haya restitucion di AOV na un suma cu ta varia entre 4000 pa 6000 florin no ta ricibiendo esaki mas.
- Den un forma dictatorial Gabinete Eman a aumenta e edad di pensioen di 60 pa 65 aña. Asina pues e pensionadonan casa ta perde di haya un suma di 109 mil florin den 5 aña y esnan soltero tambe ta perde di haya 65 mil florin den 5 aña.
- E pensionadonan cu ta ambtenaar a ser masacra door cu Gabinete Eman a corta den nan derechonan, e.o. a aumenta e edad di pensioen te 65 aña, a introduci e Middelloonregeling, Franchise cu a aumenta di Af. 14059 te Af. 17616 pa aña, e Duurtetoeslag a ser reduci di 36.1% te 17.7% y e porcentahe di acumulacion di pensioen a baha di 2.15% te 1.75%. Pues den un solo palabra, un masacre total di e pensionadonan di gobierno, kendenan lo bay atras drasticamente den nan pensioen!
- E pensionadonan di gobierno te ainda ta wardando riba e pago di 85 florin di inhaalmanoeuvre cu gobierno debe nan y cual ta suma riba 4000 florin desde 2013.
- E pensionadonan tambe ta sufriendo di e aumento drastico di e prima di AZV y BAZV y alavez ta ricibiendo un trato medico di calidad inferior, caminda nan tambe tin cu warda lunanan largo prome cu nan por haya un cita pa specialista, hospital of otro testnan medico necesario.
Alabez mester recorda Melvin Tromp cu Gabinete Eman recientemente a exonera su mes di un debe di 61 miyon florin cu nan tabatin cu SVB y di cual suma ta di nos pensionadonan. Door di e exoneracion aki SVB no por aumenta e suma di pensioen entrante 2017 den un forma mas husto ya cu e intencion ta di aumenta e suma di pensioen cu un miserabel 2.3%.
Pues prome cu Melvin Tromp pone poco disparate riba papel, e mester analisa su consenshi y di su partido y mira con su gobierno di AVP no tin ningun bon intencion cu nos pensionadonan y awe na vispera di eleccion kier pretende cu nan si a traha na beneficio di e grupo di nos grandinan aki.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...