Awe como politico e ta exigi e restitucion! 

Pa hopi aña e sistema di contribucion na e fondo di pensioen di behez (AOV) tabata pa pareha.  E pensioen cu nan tabata cobra tambe tabata pa pareha casa. Esaki kier men cu ora e prima cu un pareha tin cu paga yega e suma maximo, nan ta haya e placa cu nan a paga dimas bek. Esaki ta e restitucion di prima di aov cu hopi hende tabata conta riba dje como un extra entrada na fin di aña of den aña despues. Ora separa e pago di prima pa e fondo di pensioen di behez, cada trahado, tambe den un pareha, ta paga nan prima separa. (Esaki tabata e individualisacion di e pensioen di AOV)

HYPOCRESIA
E miembronan di e partido MEP tur aña ta keha cu hende no ta haya e restitucion di nan prima y te hasta nan ta acusa gobierno di ta nenga di haci e restitucion aki. E realidad ta cu tur aña gobierno y departamento di belasting ta pone un suma halto di basta miyon florin den presupuesto pa paga e restitucion di primanan. Ora tur hende a kere cu e protesta di e partido MEP tabata uno husto y sincero, a resulta cu e ta nada mas cu otro ehempel di hipocresia politico. A resulta cu den su conseho na gobierno di Aruba na 2002, e inspector di belasting a conseha pa stop restitucion di e primanan di aov cu hende tabata haya pa hopi aña. Esaki ta loke e "inspector di belasting" na 2002 y actual lider di MEP a conseha: (Traduccion) "Na april 2000, durante di e "Pension Summit", SvB a presenta e proposicion pa individualisa e pensioen di AOV. Esaki ta ensera cu ta cambia e pensioen di AWG 1.516,00 pa pareha casa, pa dos pensioen individual di AWG 900,00. Consecuencia di esaki ta anto cu e pago di prima tambe mester wordo individualisa y cu mester para e restitucion di e prima."
Loke cu e conseho aki di e "inspector di belasting", e actual lider di MEP y e comportacion di MEP den parlamento ta bisa bo ta, cu nan ta capaz di scirbi y bisa kico cu ta, ki ora cu ta. Anto e mes un hendenan ta capaz di bisa y scirbi algo completamente contrario despues, si ta cumbini nan. Kico e consecuencia pa pueblo ta, no ta importa nan. E caso aki ta un ehempel bon cla di esaki. Esaki ta OPORTUNISMO y HIPOCRESIA maximo! #kenporkereMEP

Expresionnan haci den e articulo aki no necesariamente ta refleha opinion di ArenaPoliti.co