E manera cu Baba Herde ta scohe pa manipula nos Pueblo cu mal informacion ta decepcionante y sigur condenabel. Pasobra Baba cu su manipulacion di informacion ta segregando nos Pueblo net na momento cu nos Pueblo mester ta mas uni pa por enfrenta tur e consecuencia di e mal gobernacion di Gabinete Eman cu Baba mes a deha di controla como parlamentario di nos Pais. Awor Baba kier bruha tera riba e tema di pensioen, pero na nos opinion Baba mester tin berguensa di papia riba pensioen di biehes.

Kier sconde tras di conseho di un inspector di 2002
Tur tempo Baba a vota PRO pa hisa edad di pensioen pa 65 aña, Baba a vota VOOR pa individualisa pensioen di biehez kitando e restitucion cu pareha casa tabata haya, Baba a aproba pa hisa prima di AOV di 13.5% pa 14.5 % na 2014 y despues na 2015 Baba a bolbe vota PRO pa aumenta e prima di AOV na 15,5% y banda di esaki Baba a vota VOOR pa hisa e premieloongrens tambe. Anto despues di tuma tur e medidanan aki contra Pueblo, awe Baba kier purba scapa su cara den Pueblo door di bin yora riba un carta di conseho cu un Inspector di Belasting a haci na 2002. Bay ta un hende sin un tiki berguensa! Baba ta haci esaki pa motibo cu e Inspector aki awe ta Parlamentario mr. Evelyn Wever-Croes y lider di MEP. Pasobra si e inspector tabata liga na AVP, Baba NUNCA lo a saca e conseho aki den publicidad. Esaki nos ta yama oportunismo politico na unda ta core zwaai cu un conseho cu un ambtenaar a haci na su Minister na 2002, pa use como excusa pa aprobacion di medida cu Gabinete Eman si a tuma. Awor kiko ta pio, e conseho di 2002 of e medidanan cu Baba a VOTA VOOR pa nan cu wowo sera?

Rapport di AVP su FESCA di 2004 riba pensioen
Mas tristo ta cu Baba kier zwaai cu un conseho di 2002, pero no ta menciona nada di nan propio rapport di FESCA “un pensioen sigur pa un y tur” di 2004 den cual AVP ta papia di, entre otro, e edad di pensioen di biehes. Den e rapport aki cu a wordo firma y entrega na Parlamento pa Mike Eman di Fraccion di AVP, ta menciona bon cla cu AVP ta boga pa e edad di pensioen keda na 60 aña. Pero awe cu Mike Eman ta den Gobierno, ata Baba ta laga rapport di FESCA un banda y ta VOTA PRO pa hisa edad di pensioen na 65 aña! Esaki ta e HYPOCRESIA politico di Baba, Eman y henter AVP cu a convence Pueblo cu nan rapport di FESCA cu e edad di pensioen lo keda na 60 aña pa despues hise na 65 aña pasobra nan tin e poder pa haci esey.

MEP ta propone pa baha e edad na 62 aña
Awe MEP ta propone pa baha e edad di pensioen na 62 aña na bienestar di nos Pueblo y ata Baba y AVP kier reclama cu no por. Pero si nan rapport di FESCA mes ta bisa cu e pensioen mester keda na 60 aña anto e ora ey Baba y AVP no por tin nada contra pa e edad di pensioen bay na 62 aña. Y si Baba y AVP su bende ta sigi bisa cu no por, e ora ey nan mester splica Pueblo dicon nan tabata asina hypocrita di pone den e rapport di FESCA di 2004 cu e edad di pensioen ta keda na 60 aña. Pasobra mirando locual AVP mes a pone den e rapport di FESCA, Baba mester tin berguensa di papia riba pensioen di biehes.

Expresionnan haci den e articulo aki no necesariamente ta refleha opinion di ArenaPoliti.co