E situacion malo den nos turismo ta uno serio y hopi preocupante. Despues di 6 anja di maneho di turismo di Otmar Oduber e unico conclusion cu nos por saca ta cu e minister a faya. E la faya den su vision, mas bien e no tawata tin un vision, e no tawata tin un masterplan y a laga nos turismo bai for di man. Awe nos no ta papiando di un pais exclsivo cu ta atrae turistanan di calidad cu ta gatsa hopi placa durante nan estadia sino mas bien di ‘’massa toerisme’’. E minister Otmar Oduber a fracasa den atrae turistana di calidad y e cifranan ta papia pa nan mes. E turistanan di awe NO ta gasta placa den nos economia y e cantidad di placa cu nan ta lagando atras cada vez ta birando menos. E mensahe cu nos kier manda pa Otmar Oduber ta cu loke ta drive nos economia NO ta CANTIDAD di turistanan sino CALIDAD di turistanan y e placa cu nan ta laga atras. Anja 2015 tawata un anja basta dificil caba pa nos turismo. Un crecemento a wordo realiza den cantidad di stayovers pero esaki ta danki na e crecemento inusual y explosivo for di turistnan Venezolano cu gran parti di nan NO por wordo considera turista. Anja pasa un cantidad di 350,000 turista Venezolano a bin nos pais y esaki tawata un aumento di mas cu 100% compara cu e anja anterior.

Pa loke ta e cantidad di placa cu un turista ta gasta durante sue stadia na Aruba esaki a cai dramaticamente. Si na anja 2014 un turista tawata gasta averahe 2,668 florin durante su estadia esaki a cai te na 2,400 florin na anja 2015. Esaki ta un caida di 10%, esta un caida di double digits. Nos no mester lubida cu anja pasa ATA a inverti 73 miyon florin den mercadeo di pais Aruba y resultado ta hopi pober y mas bien hopi preocupante. Na momento cu tin un minister terco manera Otmar Oduber cu no kier mira kiko ta pasando den nos turismo y ta keda insisiti cu turismo ta bayendo bon mientras e cifranan ta demostra lo contrario nos pais ta den problemanan hopi serio. Turismo no ta algo pa haci wega cune. Ta demasiado hende riba e pais aki ta depende di turismo pa tin un minister cu ta sinta haci wega cu esaki. Mester bin cambio rapido den maneho di turismo pa Aruba no wordo perhudica mas. Mester bin un maneho cu ta dirigi riba atrae turistnan du calidad, mester bin un maneho dirigi riba atrae proyectonan di calidad, proyectonan di 5 strea cu lo eleva nos calidad turistico. Nos mester traha un masterplan pa nos turismo cu lo enfoca unda nos kier mira nos pais aki 10 pa 20 anja. Actualmente no tin un maneho y e maneho ta mas bien dirigi di entre otro yuda amigonan y tuma decisionan ad hoc lubidando e imprtancia cu turismo tin pa nos pais!

Expresionnan haci den e articulo aki no necesariamente ta refleha opinion di ArenaPoliti.co