Minister Otmar Oduber a tuma nota di declaracionnan di e parlamentario den oposicion y ta opina cu ta un lastima cu un politico relativamente hoben por ta asina mentiroso. E mandatario ta referi na e insinuacionnan haci pa Sr. Dangui Oduber relaciona cu un supuesto rapport devastador di AAA riba hotel banda di aeropuerto. "Mi ta reta Sr. Dangui Oduber pa saca e supuesto rapport devastador di AAA. Esaki ta existi den su mundo di fantasia, e ta un rapport fantasma." Minister Oduber a tuma contacto cu dirigentenan di AAA y na ningun momento tin un rapport traha ariba cualkier hotel, alcontrario e director a indica na e mandatario di ta sostene e plan pa un hotel den e area. Tin reunion for di basta tempo caba pa locual ta trata desaroyo di henter e area. "Pues cu aeropuerto ta contra di e proyecto ta un otro mentira di Sr. Dangui Oduber."

Mester ta cauteloso ora ta trata cu inversionistanan segun e mandatario y no mester cera porta pa esnan cu kier inverti na Aruba. Minister Oduber ta haya masha chistoso pa tende e declaracionnan di Sr. Dangui Oduber cu ta trata aki di amigonan di e minister. E mandatario ta mustra riba e hecho cu den e cantidad di votonan ricibi si e ta conta cu mas cu 4 mil amigo cu a demostra e confiansa cu tin den su persona y ta desea pa un dia Sr. Dangui Oduber lo por gosa di e mesun confiansa aki. E minister ta sigui comenta: "Pero den e caso aki specificamente mi ta kere ta bon pa e puntra su tata, cu tabata 'wine and dine' cu e personanan cu ta bay desaroya e proyecto aki. Si tabata MEP ta den gobierno awe y ta trata di inversionistanan conoci cu nos, manera Sr. Oduber tabata 'wine and dine' cu e grupo, nan lo a corta relacion cu e inversionistanan aki. Nos no ta kere den e mentalidad tristo aki. Ta trata aki di hende cu ta cla pa inverti, pa sostene economia di un pais sin mira cua color ta na mando." E mandatario ta aprecia inversionistanan serio cu enberdad ta cla pa contribui na nos economia y tin e pais aki na curason. Por agrega te hasta cu pa e hotel aki Minister Oduber no por duna ningun permiso pues e no ta compronde ta con e lo por yuda un amigo di dje, pero e ta sostene e proyecto si.

No ta trata di un plan nobo, un hotel na nos aeropuerto ta den un master plan di añanan largo. For di tempo di Beatrix 2000 ta papia di un desaroyo comercial banda pariba di e aeropuerto. Minister Oduber ta kere cu e proyecto aki lo por sostene e vision di crea di Aruba un Hub y na di dos luga e hotel aki lo enfoca riba e turista cu ta bin Aruba pa negoshi y ta keda pa un of dos dia. "E ta un proyecto masha normal, unda den tur pais desaroya bo ta haya un hotel cerca di un airport. E tereno ta un 'eigendoms terein' y plannan ya caba ta na DOW unda cu pa e 'bouwvergunning' lo por pasa na mi colega Minister Sevinger pa mas detaye." E mandatario ta finalisa bisando cu pa locual ta trata un operador pa e hotel aki, ta negoshando cu nombernan renombra manera un Hyatt. Un di e condicionnan cu Gobierno a pone pa e proyecto aki ta cu e operador mester ta na un nivel di Hyatt of mas halto. "Awo ami kier sa na cua Hyatt Sr. Dangui Oduber a keda y a paga 60 dollar pa anochi."

Expresionnan haci den e articulo aki no necesariamente ta refleha opinion di ArenaPoliti.co