ORANJESTAD – Minister President Mike Eman a tuma iniciativa pa comunica directamente cu e conocido empresa Tesla riba e posibilidad cu por aplica nan tecnologia nobo di almacenamento na Aruba; specificamente kico esaki por nifica den e conversion di energia limpi pa nos isla. E oportunidad a presenta durante un sesion di dialogo den cuadro di e US Caribbean Latin America Energy Summit. Aki e Head of Delegations, den persona di Premier Eman, a topa cu representantenan di sector priva incluyendo ehecutiva di e empresa innovador aki.

Tesla ta conoci mundialmente como inventor y fabricantenan di e auto di coriente den mas demanda actualmente pasobra ta esun di mas moderno y optimal. Adicionalmente, Tesla a desaroya un tecnologia avansa di bateria pa uzo domestico cu tin almacena un cantidad considerabel di energia produci dor di panelnan solar. Esaki ta destina pa casnan cu kier ta independiente di e grid nacional y apesar cu e escenario aki no ta cuadra cu e vision di Aruba como pais, toch ta wak espacio pa nos isla beneficia di e tecnologia.

E idea ta pa traha hunto cu Tesla pa hiba e capacidad ya caba impresionante di almacenamento di energia den e sistema di bateria aki na un escala mas grandi. ‘Stabilidad ta importante y avancenan tecnologico manera e bateria di Tesla ta yuda,’ asina Prome Minister Eman a declara. ‘E ta eficiente y pagabel,’ e mandatario a bisa acerca.

Durante e encuentro a haci palabracion cu Tesla pa haci un bishita na nan instalacionnan y nan tambe lo bin Aruba pa wak con por desaroya e relacion pa loke ta trata ‘storage capacity’ y tambe pa mira e parti di transporte. No ta un secreto cu Gabinete Mike Eman II ta trahando varios aña caba riba e idea pa haci transporte publico, flota di Gobierno y, den lo posibel, tur auto na Aruba, sea electrico pa medio di energia renovabel of por lo menos hybrid. Esaki ta representa un stap mas den e vision pa e isla completo ta 100% sostenibel. 

Expresionnan haci den e articulo aki no necesariamente ta refleha opinion di ArenaPoliti.co