Na mas cu un occasion caba a wordo demostra den corte cu Benny Sevinger no ta tene su mes na e ley di ordenza territorial (ROP) y a perde varios caso den corte. Un minister cu perde asina tanto caso den corte ta pasobra e ta incapaz pa goberna e pais aki y mester bai su cas.
E siman aki un biaha mas Benny Sevinger a perde un otro caso den corte caminda e la duna ‘’toezegging’’ pa bin un construccion di un condominium den zona berde y huez a prohibi esaki.
No solamente tin e sentencianan aki pero tin e sentencia di e compania Bouldin & Lawson tambe. Pa 6 anja largo Benny Sevinger y gobierno di AVP a demoniza e proyecto di dump y tawata insinua cu ta un proyecto corrupto. Nan a bai asina lew di bisa cu placa di pueblo a wordo tira afor y cu e machinenan no ta traha y no por procesa ningun sushi. E compania Bouldin & Lawson a lanta un caso contra gobierno y den luna di maart 2016 tawata tin un veredicto hopi importante. E sentencia di huez ta confirma y ratifica cu e compania Bouldin & Lawson a entrega na gobierno loke a wordo pidi y a cumpli cu tur e exigencianan cu a wordo stipula. Tambe e sentencia di huez a confirma loke hopi tawata pensa. Benny Sevinger y su gobierno tawata duna instruccion pa boycotea e proyecto aki. E machinenan cu ta usa diesel pa por traha NO tawata haya diesel. Benny Sevinger tawata duna instruccion pa no cumpra diesel pa e machinen por traha usando e pretexto cu no tin placa.

Siman pasa ami cu mi colega Xiomara Ruiz Maduro a haci un bishita na Dump na Parkietenbos den nos calidad como parlamentarionan. Na yegada nos a topa cu un security kende a bisa nos cu e no por laga nos pasa sino nos mester pasa oficina. Ora nos a yega na oficina no tawata tin ningun hende y nos a dicidi cu nos ta drenta paden pa mustra pueblo e realidad di e situacion cu Benny Sevinger a crea riba dump. Grandi tawata nos sorpresa ora nos a tende cu despues di nos bishita Benny Sevinger a cuminsa un investigacion pa castiga esnan responsabel pa laga nos drenta. Nos kier manda e mensahe cla y raspa pa Benny Sevinger, DUMP NO TA DIBO, e ta di pueblo y tur hende mester wak e desaster cu bo a crea. Nos NO lo accepta pa bo castiga ningun trahador pasobra ta nos a dicidi cu nos lo drenta riba nos mes. Acaso dump ta bo cura di cas cu nos no por drenta y wak? Dump ta di pueblo y tanten esey ta e caso tur hende tin derecho di subi wak kiko ta e situacion. Nos ta lamenta profundamente con gobierno kier dicta y persigui hende manera cu nan ta haci. E mensahe ta bai pa gobierno, nos lo sigui trece cu imagenan pa pueblo e situacion cu boso a crea y NO lo accepta persecusion y intimidacion di ningun hende!!! 

Expresionnan haci den e articulo aki no necesariamente ta refleha opinion di ArenaPoliti.co