Durante conferencia di prensa semanal di Partido MEP, Parlamentario sr. Guillfred Besaril a elabora riba e situacion den e Instituto Coreccional di Aruba (KIA). Sr. Besaril a declara lo siguiente:

"Nos fraccion a tuma nota recientemente di e nombracion di Alto Inspector, señor Rocco Tjon, como e proximo director di KIA. Sr. Tjon ta un colega cu mi a traha hopi di cerca cun’e durante mi periodo como Sindicalista. Un persona dinamico y bon prepara. Na nomber di nos fraccion mi kier a felicita señor Tjon cu su nombracion y ta desea su persona hopi forsa y sabiduria den e reto nobo.

Papiando di reto, KIA ta keda un Instituto cu retonan grandi. Tin aspectonan delicado cu mester di atencion lo antes posibel. Entre e puntonan di atencion tin entre otro e maneho di personal. Esnan cu ta labora na KIA ta sclamando pa mas atencion pa cu nan situacion na pia di trabao. Un mehoracion den nan espacionan di trabao, ya cu awor tin oficinanan cu ademas di ta den mal condicion, tin hasta schimmels den nan! E trahadornan kier mas enfoke riba loke nan ta haci bon y no solamente riba loke ta bay malo. E trahadornan mester di mas material pa traha cun’e, mas siguridad na pia di trabao y kier un mehoracion den e administracion di nan promocionnan. Asina por sigui menciona diferente punto mas.

Ademas di asuntonan di personal, tin e aspecto di formacion y reintegracion den sociedad pa esnan cu sinta castigo den e Instituto. Pa mas di 6 aña no tabata tin un maneho fiho y a largo plazo riba e tereno menciona. E ta increibel cu e Instituto tin e palabra "Coreccional" den su nomber, pero cu na momento di analisa e situacion real ta masha poco ta sosode n'e nivel aki. Tabata tin diferente iniciativa berdad, pero cu na caminda a cay na awa pa motibo di escogencia of prioridad politico y tin diferente iniciativa cu ta gracias na e esfuerzo di esnan cu ta labora den KIA ta sigui mira luz di dia.

Definitivamente KIA ta keda un reto grandi y nos fraccion ta spera di curason cu Sr. Tjon ricibi e sosten necesario pa por enfrenta e retonan cu ta sper’e como director. Na mes momento nos ta spera cu su nombracion por representa e inicio di un era diferente na e Instituto na Santo Patia", Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co