Weekend pasa, gobierno a hay’e ta bon pa informa pueblo cu e lo cuminsa asfalta e ‘Caminda Scur’. Otro prueba di ansha pa haya atencion. Asfalta un caminda miyonario cu no tin un ‘betonband’ pa proteha e caminda ora awasero cay, no ta logico. Of kisas esaki ta un otro triki di crea ‘meerwerk’ p’asina chica mas placa di pueblo. Manera a pasa cu e famoso proyecto di Tram den caya grandi.

Ta akinan caminda nos di partido ABO, kier ilustra e contraste entre realidad y fantasia. Of miho, con gobierno tin su prioridadnan robes. Diahuebs, e minister di Husticia ta informa con malo e situacion di e edificio di KIA ta y cu e no ta sirbi mas. Tambe e minister a papia di e ‘limitacionnan’ cu ta strob’e haci un miho trabou. Riba e presupuesto 2016 tin AWG. 18.705.900 destina pa KIA, di cual casi 15 miyon ta bay na gastonan di personal. No tin nada presupuesta pa un edificio nobo of un expansion di KIA. Tampoco por haya e fondonan pa esaki, riba e presupuesto di DOW (AWG. 51.340.900). Straño cu e minister ta papia cu e edificio di KIA no ta sirbi, pero niun caminda den presupuesto tin fondonan reserva pa soluciona esaki.

Durante siman, corte di apelacion a declara algun cuidado di preso liber, pa entre otro e situacion malo na KIA. E asunto di KIA, no ta un asunto di siman pasa. E ta un asunto di añanan largo y te ainda nada ta wordo haci pa mehora e situacion peligroso aki. KIA ta haya solamente atencion, ora un preso huy, algun preso subi dak of ora un sindicalista bay media. Mientrastanto e situacion deplorabel na KIA, a haci cu KIA a bira un otro peliger pa e sociedad. Cada dia no solamente mas preso ta wordo cera den KIA, pero tambe e tipo di preso awendia ta mas agresivo, violento y peligroso. Pero asina mes, nada ta wordo haci pa aumenta e capacidad of mehora KIA.

Sin duda, pueblo tin cu haci su mes e pregunta si ta intencionalmente gobierno kier laga e situacion na KIA bay for di man. A pesar cu ultimo tempo e agresividad bou di e criminalnan local a aumenta, e mayoria di e criminalnan peligroso ta bini for di exterior. Esaki ta e consecuencia di duna tur sorto di hende permiso pa bin traha of establece nan mes na Aruba. Nos di partido ABO tin hopi comprension y duele pa polis y cuidadonan di preso, cu ta mira cada dia nan trabou bira mas pisa y peligroso, pasobra algun politico kier ta populista. E ta manera ‘dweilen met de kraan open’.

Un dicho ta bisa cu macaco ta hunga cu su yiu te ora e saca su wowo. Wel, aki no ta trata di wowo di macaco. Aki ta trata di bida di hende y siguridad di un sociedad. Manera gobierno a haci hopi hende mudo y sordo caba pa e realidad, kisas esaki tambe ta su intencion pa haci pueblo ciego. Asina pueblo lo no wak e cantidad di abuso cu ta wordo comete contra dje tur dia. Nos di partido ABO ta urgi gobierno, cu net manera e por haya placa pa tur otro cos cu ta beneficia solamente un grupito, pone e fondonan necesario ‘per direct’ pa un edificio nobo pa KIA. Tambe pone mas fondo disponibel pa combati e insiguridad cu gobierno mes ta stimula y stop di duna permiso na tur extranjero pa loco. Nos ta sigur cu pueblo lo kier bay un ‘tiki mas den rood’ pa combati insiguridad y sinti su mes sigur, enbes di bay hopi ‘rood’ pa un ‘Caminda Scur’ di 750 miyon florin cu no tabata tin necesidad of prioridad!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co