Pueblo di Aruba, supuestamente dos parlamentario Hulandes a duna elogio na Aruba y na gobierno di Aruba den e prome tres dianan di debate den Tweede Kamer. Asina a wordo raporta door di sr. Rene Herde. Na prome instante bo persona ta bira contento ora bo tende esaki siendo un conciudadano Arubano. Pero, siguiendo e informacion duna door di sr. Herde, bo ta compronde cu no tin nada nobo of desconoci den e declaracionnan di e dos parlamentarionan Hulandes. E prome ta cu  sr. Bosman ta elogia Aruba relaciona cu Aruba su rol den suministra e aliadonan combustibel durante e segunda guera mundial. El a bay den detaye tocante e asunto aki relaciona cu conmemoracion di e 72 aña di e liberacion di Europa. Aruba y no gobierno di AVP a haya elogio. E di dos ta di sr. van Raak. Relaciona cu sr. Herde su declaracion cu Aruba no a scoge pa independencia, pero a scoge pa usa su derecho di auto-determinacion den un forma diferente y a scoge pa autonomia den Reino. Sr. van Raak a comenta riba esaki cu su persona tin hopi respet pa escogencianan di Aruba. Tambe cu Aruba tabata na caminda pa independencia y cu e pueblo despues di 10 aña no a scoge pa independencia mas. Loke sr. van Raak a lubida di menciona ta cu ta e propio Hulanda a impone Aruba pa acepta e opcion di bira independiente despues di 10 aña di Status Aparte. Tambe sr. Herde a lubida di menciona cu ta gobierno di MEP a negocia exitosamente pa kita e fecha di independencia for di Statuut. Nada di AVP! Por cierto AVP a encurasha e pueblo bay beach dia di referendum pa e libertad di Aruba. Como un parti masha comico ta e supuesto elogio na sr. Herde pa su rol den e deliberacionnan cu Hulanda. Pueblo di Aruba, cua logro sr. Herde tin riba su nomber como resultado di deliberacionnan cu Hulanda? Sr. Herde a logra stop e ley di CAFT, manera e tabata propaganda?  Sr. Herde a logra keda cla cu e ley di geschillenregeling manera e mes a propone? Su persona ta adicto na troce e berdad y di haci politica super barata cu cualkier asunto ya cu pueblo di Aruba no ta cuestion’e. Como e cherry riba e bolo berde, ta e supuesto comentario di sr. van Raak, duna door di sr. Herde, cu Aruba ta e HUB pa companianan Europeo pa por yega America! Hulanda tin mas cu un embahada na Colombia! Hulanda ta e di cuater mercado economico mas grandi di Brazil. Sr. Eman a hunga pa Cristofer Columbus durante e evento Europe meets the Americas. Esey si, pero companianan Europeo na Aruba, esey si ta hopi scars! Hasta Hulanda y Eman nan mediador pa e hub, sr. Kiko Gomez, ta den prizon na Colombia, culpa di a laga mata mas cu 30 hende, droga y contrabanda!  Tremendo hub Aruba lo ta! Na final, sr. Herde ta trece padilanti e unico interes real di gobierno di Aruba den e debate. Esaki ta pa trece cambionan den Statuto di Reino pa limita aplicacion di e Algemene Maatregel van Rijksbestuur den futuro. Pues, gobierno di AVP no kier mas KB! No mas welga di hamber. Nan kier haci y deshaci sin cu Hulanda por bisa nan algo pa medio di Statuto di Reino. Gasta placa di e pueblo di Aruba manera gobierno di AVP ta desea, sin ningun consecuencia legal. Pueblo no ta reclama toch y ta lubida liher segun Sr. Eman.

Expresionnan haci den e articulo aki no necesariamente ta refleha opinion di ArenaPoliti.co