Prome Minister Eman y Minister Sevinger den bishita na proyecto. 
Calidad di bida ta wordo mehora considerablemente pa e ciudadanonan. 

ORANJESTAD – Diahuebs mainta Prome Minister Mike Eman hunto cu su colega di Infrastructura Minister Benny Sevinger a haya un bista di e avancenan den e proyecto Green Corridor. Un proyecto cu ta cambia e cara di Aruba por completo, pero tambe cu ta trece un miho calidad di bida pa e pueblo di Aruba, principalmente pa esnan di pariba di brug.

E prome punto di bishita tabata na e parti abou di e actual brug, unda un team ta trahando pa crea e brug moderno den forma di arco cu lo wordo arma y incorpora den e caminda di dobel via cu ta construyendo di aeropuerto pa Savaneta te San Nicolas.

E cambionan sinembargo lo no keda te na Savaneta, ya cu tanto e caminda principal como e camindanan na banda lo wordo mehora y embeyece. Esaki ta un cambio grandi unda cu no solamente e caretera ta conoce cambio, pero e calidad di bida di e ciudadanonan ta wordo mehora cu areanan bunita den nan bario y 13 punto unda lo construi Parke y areanan di recreacion.

500 meter prome y 500 meter despues di e brug actual ta keda bashi pa cual Gabinete Mike Eman II a pidi e compania di ODINSA pa construi un Linear Park cu ciudadanonan di principalmente pariba di brug por uza pa mantene curpa den condicion of simplemente disfruta di e escenario den compania di famia.

Segun e contratista y Gobierno, e proyecto Green Corridor ta canando segun schedule y lo finalisa manera a keda programa. Pa e motibo aki, esnan cu ta uza e caretera di San Nicolas pa Playa por constata cu tin construccion andando simultaneamente na e brug, Pos Chiquito y Savaneta loke ta encera cu e proyecto ta bay wordo entrega den fase pa e por cuminsa wordo uza, permitiendo un miho fluho di trafico.

Den e estudio haci prome cu e proyecto a wordo otorga, a constata cu diariamente tin rond di 24 mil vehiculo ta sali di pariba pa bay Playa. E dobel via lo percura di e forma aki pa un miho fluho di e trafico pisa aki y practicamente ta elimina accidentenan frontal.

Expresionnan haci den e articulo aki no necesariamente ta refleha opinion di ArenaPoliti.co