E palabra sostenebilidad ta acapara tur e metanan di e cambio profundo cu nos mester trece, pa sigura un futuro mas husto y cu ta evita ripiticion di erornan di pasado. No solamente sostenebilidad den sentido di mas uzo di energia renovabel pa stop di causa daño na medio ambiente natural, pasobra energia renovabel nunca ta caba y pasobra energia renovabel lo stabilisa prijs di coriente a largo plazo. Ta trata tambe di sostenebilidad social y economico, cu ta nifica cu e desigualdad creciente y e polarisacion cu tin rond di mundo, mester wordo para. Esey ta rekeri cambionan extenso y profundo pa sigura cu niun caminda y den niun forma e desigualdad cu tin den mundo y den nos pais ta keda existi. Nos enseñansa por ehempel no lo por sigui nenga acceso na niun tipo di scol cu e excusa cu e studiante falta algun punto of cu e no ta cla pe. Of sigui señala fayonan den siñamento di un studiante of, sin actua adecuadamente, sigui duna famia y muchanan culpa pa keda sinta y ripiti henter un aña. E cantidad mucho grandi di hobennan cu no ta experiencia enseñansa como e vehiculo pa nan proogreso personal ta un señal alarmante. No por sigui considera salarionan minimo como e base di un sistema husto pa structurá entradanan, mientras cu e sistema di salarionan minimo ta haci sostenebilidad di un comunidad imposibel. No por sigui hustifica e diferencianan grandi entre salarionan den nos pais y entre diferente sectornan. Tur hende mester por yega na un trabou cu perspectiva di crece den futuro. Tur hende mester por yega na un cas di su mes riba su propio forsa. Esakinan mester ta plannan cu hende ta traha pa realisa, no soñonan cu nan ta sinti cu nan nunca lo alcansa, mientras pa otro si nan ta realisabel. Un comunidad cu tin mucho hopi desigualdad y falta di oportunidad, ta bira a lo largo un comunidad instabiel. Un comunidad cu no ta sostenibel.

Aruba ta riba bon caminda
Ta bon pa wak cu den e ultimo dos periodonan di gobernacion, ta netamente e metanan di sostenebilidad fisco y social ta loke a sobresali den e maneho riba practicamente tur tereno. E trancision pa uzo di energia renovabel, e siguransa di entradanan mas igual pa tur pensionado, e reduccion di diferencia entre pensionadonan door di e cresion di un pensioen general pa tur trahado, e compensacion di costo di bida y e contribusion na salarionan mas abou for di caha di gobierno (=reparatietoeslag), e fortificacion di AZV pa sigura tur hende acceso igual na cuido medico, e maneho di turismo pa sigura cu tur hende ta sigui participa y saca beneficio di turismo, e iniciativanan pa sigura hubentud cuido y guia despues di scol, mas acceso na arte y deporte pa nos hobennan, iniciativanan pa crea mas trabou y crea mas empresario Arubano. Esakinan ta e tipo di politica dirigi riba un futuro mas sostenibel pa nos tur na Aruba. E maneho aki ariba tur tereno, lo sigura un Aruba mas sostenibel. Pero tambe un pais mas stabiel y mas husto. Den e forma aki e concepto di sostenebilidad ta toca nos tur den nos bida diario. E no ta un idea academico of un fantasia politico manera oposicion ta pint'e. E ta toca nos tur den nos bida y trabou diario, awor y den futuro. Mas sostenibel nos pais ta, ta mas oportunidad, mas seguridad y mas stabilidad e ta duna nos tur.

Expresionnan haci den e articulo aki no necesariamente ta refleha opinion di ArenaPoliti.co