“Den e siguiente gobernacion di AVP pueblo lo ripara un accento riba renobacion di nos pais. Mas cu ya ta e caso. Pasobra pa nos sigui desaroya como Pais y Pueblo, nos mester kita tur obstaculo cu por stroba esaki. Pa nos duna miho servicio na comunidad, pa duna miho enseñansa y miho cuido, pa duna mas oportunidad pa inversion y pa stimula productividad y rendimiento den nos economia, nos mester cambia tur cos cu ta of por stroba. Renobacion lo ta un di e liñanan berde den maneho riba tur tereno.” Esey Rene Herdé a splica awe den reuda di prensa di partido AVP.

DESEO DI PUEBLO 
Rene Herdé a bisa cu den tur contacto cu pueblo, sea den bishita di cas of den reunionnan cu AVP organisa, ta tende hende pidi pa mas y miho servicio, tambe di gobierno. Cu tur e desaroyonan nobo cu gobierno mes a crea, Pueblo ta wak oportunidad pa crece y kier haci bon uzo di esakinan. Pueblo kier tuma su propio iniciativanan, pero kier pa gobierno kita e obstaculo cu nan ta topa den nan caminda. Rene Herdé: “Pesey nos mester sigui renoba leynan, proceduranan y formanan tradicional pa haci negoshi y duna servicio riba tur tereno. Renobacion di nos pais no por ta limita na un area of den gobierno so. E mester ta henter nos pais. Tur e renobacion cu ya a tuma luga den nos pais den e añanan desde 2009, a crea un estimulo economico y social, cu mester sigui. Pasobra e ta crea oportunidadnan nobo, cuponan di trabou y actividadnan nobo. Ta esey ta loke a saca nos pais for di e crisis cu MEP a bay laga nos pais aden. Y ta esey pueblo kier wak. Pasobra ta esey ta crea e miho calidad di bida y e tipo di comunidad cu nos kier. Ta esey ta loke nos ta bay haci mas ainda den e añanan cu ta bin.”

Tin algun area cu ta responsabilidad di gobierno mes y ta gobierno lo mester tuma iniciativa y ehecuta, manera enseñansa, salubridad, servicionan di publico, etc. Pa e areanan aki partido partido AVP ta presenta na pueblo plannan pa worde ehecuta den e añanan di gobernacion cu ta bin. Loke a cuminsa den e añanan cu a pasa, mester sigui y bira ainda mas.

Expresionnan haci den e articulo aki no necesariamente ta refleha opinion di ArenaPoliti.co