ORANJESTAD – Diasabra den oranan di atardi Prome Minister Mike Eman hunto cu colega Sevinger a sali pa inspecciona areanan rond di Aruba, manera Hadicurari y e damnan. Na mita caminda nan a wordo compaña tambe pa Minister Otmar Oduber ora a bay na e diferente damnan. Den e recorido a constata cu e beachnan di Aruba a sufri basta daño pa cual mester busca solucion structural.

Na momento cu Prome Minister Mike Eman tabata di bishita na e beachnan a topa cu varios bishitante, entre otro pareha Maes, kendenan normalmente semper ta cana den e area ey riba e beach pa relaha. E efecto di horcan Matthew a trece un cantidad di sushi. “Ta pica tur loke naturalesa ta haci. Normalmente nos ta disfruta di e lama y beach bunita. Pero di otro banda mi tin cu bisa cu nos tabatin hopi suerte pasobra si el a pasa como horcan 3 cerca di nos, e daño lo tabata hopi mas grandi,” e pareha a bisa.

Tabatin diferente persona canando riba e beach mirando con e situacion a keda y a expresa cu esaki no ta stroba nan di bolbe Aruba y cu e solo ta sali toch. “Nos ta contento di por ta un rato den compania di Prome Minister di Aruba,” Peggy, un turista Mericano bishitante regular di Aruba a expresa.

Na momento di mal tempo funcionarionan di DOW, departamento cu ta cay bou di Minister Benny Sevinger, ta subi caya pa mira e efecto di e yobida y cu e fluho di awa ta core bon. “Nos por a mira cu naturalesa a manda hopi sushi riba e beachnan. Personal di DOW ta stand-by pa un siman caba y asina cu e mal tempo a yega, nan a cuminsa actua, tanto na beach como rond di Aruba.“ E mandatario a splica cu diasabra for di oranan di mainta, funcionarionan di DOW a cuminsa cu trabou di kita tur material cu ta forma un peligro na Madiki Kavel, banda di Colegio Arubano, beach y varios otro luga cu mester di e precuacion aki. Nan a traha den combinacion cu e diferente ploegnan di limpiesa pa cual e mandatario a manda palabra di gradicimento na tur pa e trabou cu nan ta haciendo for di diabierna ora cu e mal tempo a yega Aruba.

For di diahuebs anochi te cu diasabra mainta, e mandatarionan a subi caya cu grupo grandi manera funcionarionan di DOW, ploegnan di limpiesa, miembronan di InfraTeam, pero tambe boluntarionan. Un di e luganan cu e mandatarionan a bishita tabata Tamarijn, unda cu e mal tempo a causa cu e awa di yobida y lama a yega te na otro banda di caminda. Eynan DOW a pone dos pomp den funcion pa manda e awa bek pa lama. E situacion dilanti di Tamarijn cu mal tempo semper ta bira un peligro y den e caso di horcan Matthew, e mal tempo a come practicamente henter e beach ey dilanti. Minister Sevinger a splica cu e siman aki lo haci un analisis, aunke ya caba nan a bin ta reuniendo riba e situacion di Divi y Tamarijn. A constata cu cada tanto tempo e beach ta wordo coba y despues poco poco ta bolbe. Ultimo lunanan DOW a yena cantidad grandi di truck di santo na e beach dilanti Tamarijn, sinembargo awor cu e pasada di e mal tempo tur esaki a disparce. Ta bay evalua si lo yena e beach bek of bini cu un solucion structural.

Mirando e situacion di e beach dilanti Tamarijn y otronan ora di mal tempo, Gobierno a aserca e compania Hulandes Deltaris, cu ta experto riba trabounan relaciona cu trabounan di awa, y haciendo uzo di simuladornan y bareranan den lama, ta bay studia ki consecuencia esaki lo tin pa beachnan na e otro banda esta banda di Hadicurari bin zuid. Expertonan Hulandes hunto cu esnan di DOW ta trahando riba e testnan aki, pasobra “nos no kier busca solucion pa un banda y crea problema pa otro banda,” Minister Sevinger a bisa. El a bisa cu mester mira kico ta bay sosode awor mientras cu ta yega na un solucion structural. E reserva di santo blanco a baha hopi ultimo aña, pero lo bay 'drag' pronto na Barcadera unda cu e barconan grandi ta mara.

Expresionnan haci den e articulo aki no necesariamente ta refleha opinion di ArenaPoliti.co