ORANJESTAD – Apesar cu Aruba a scapa di horcan Matthew, su pasada den bisindario a causa hopi yobida y algun inundacion na algun parti di Aruba. Esaki tabata e motibo tambe cu Prome Minister Mike Eman, despues di tabata un siman den preparacion hunto cu diferente instancia pa e mal tempo, a subi caya diasabra atardi pa inspecciona e diferente luga afecta. No solamente pa inspecciona pero pa hunto cu su coleganan Minister di Infrastructura Benny Sevinger y Minister Otmar Oduber, encarga cu Sta. Rosa, studia si medidanan extra mester wordo tuma pa futuro.

Den e relato cu e mandatario a ricibi ta papia di casnan caminda coriente a bay, corto circuito, inundacion, pero tambe tabatin sitio unda cu strena y lamper a dal y algun persona cu tabata nan so na cas cu tabatin mester di ayudo. “Sinembargo e area cu mas daño a sufri tabata e parti di nos costanan, for di Tamarijn te na Arashi. Beachnan a keda hopi sushi cu yerba, mientras cu na Tamarijn y Divi Divi e beach a haya hopi daño. Esaki ta duna nos un tarea grandi pa busca solucion.” Na tur e sitionan cu e mandatarionan a pasa, a gradici e teamnan di DOW cu tabatin dos dia trahando caba pa haci e beach y otro areanan limpi. “Tin biaha tin critica riba e cantidad di ploegnan di SERLIMAR y DOW cu nos tin. Pero tur dia nos por aprecia e trabou duro cu nan ta haci den solo, nan ta mantene Aruba limpi tur rond. Awe nan ta haciendo nos beachnan limpi. Ta e mesun ploegnan aki tambe ta traha tur e verkeersplateaunan rond Aruba. Trahadonan duro cu tin capacidad diversifica y ta percura pa embeyecemento di Aruba.”

Pa e Ministernan tabata un alegria combersa cu diferente turista den e area hotelero cu nan a bishita, kendenan a expresa cu apesar di tur cos Aruba ta nan isla, cu nan tin comprension pa e situacion causa pa naturalesa y cu esaki lo no cambia nan amor pa Aruba.

Prome Minister Eman tambe hunto cu su coleganan a bishita dam di Rooi Afo cu tabata seco ultimo tempo. E tabata contento cu e yobida cu ta un alivio pa e tera seco y pa por lo menos yena e damnan, cu awa cu tanto e agricultornan tabatin mester di dje. “Lamentablemente pa un tempo hopi largo no tabatin awa den e damnan y e yobida aki ta yuda nos promove e tema di sostenibilidad den area di agricultura, y aumenta di e forma aki mas ainda e produccion local di alimentonan, cu awor ta hopi concentra pa uzo den famia. Nos mester crece pa por provee supermercadonan y esaki tin tur atencion di Minister Oduber, kende ta trahando pa apoya esnan cu ta traha den agricultura, cria y pesca.”

Na final e mandatario a expresa su satisfaccion pa e trabou di preparacion cu a wordo haci door di tur e instancianan envolvi. Esaki a percura cu e daño sufri no tabata asina grandi. Nunca lo por kita tur e efectonan cu un mal tempo por tin, pero si nos por haci nos esfuerso pa minimalisa esaki mas tanto posibel, Prome Minister Eman a bisa. 

Expresionnan haci den e articulo aki no necesariamente ta refleha opinion di ArenaPoliti.co