Combinacion amienda y mocion di PDR. 

Den rueda di prensa di Partido Democracia Real su lider Andin Bikker, como prome tema, a duna di conoce cu a logra un adelanto grandi pa e parlamentonan di Aruba, Curacao y Sint Maarten, cu a haya derecho di iniciativa. 

E lider di PDR a trece dilanti cu durante e reunion interparlamentario na Juni ultimo na Hulanda, su fraccion a concipia varios amienda pero tambe un mocion y di e combinacion di un amienda y un mocion, antayera a haya noticia for di Hulanda cu Raad van Staten a recomenda a base di esaki pa cambia articulo 15 di Statuut, pa e parlamentonan di Aruba, Curacao y Sint Maarten haya derecho di iniciativa. 

Kico derecho di iniciativa ta nifica ta cu e parlamentonan por traha conceptonan di ley federal cu nan ta entrega directamente na Tweede Kamer.  

Aworaki articulo 15 inciso 3 ta bisa cu si bo kier entrega rijkswet mester haci esaki via Minister Plenipotenciario. Na Hulanda PDR a muestra cu ta Parlamento ta representante di pueblo cu ta vota pa nan y cu ta nan mester haya e derecho aki pa entrega ley di iniciativa.

Andin Bikker a pidi pa haye individualmente como statenlid. Kiermen cada statenlid tin e derecho, sinembargo Raad van Staten a bisa cu mirando e cantidad di statenlidnan e ta prefera pa dune na statennan individual como organo.

Andin Bikker a expresa cu nan a bay pa un 10 y a haya un 8 y nan ta bay pa esaki. Pero e di dos stap ta, y PDR a cuminza for di ayera caba, cu el a cuminza traha un ley di iniciativa pa cu esaki y cu pa ultimo biaha nan ta spera cu e ta bay via Minister Plenipotenciario esaki ta entregue na Tweede Kamer y Tweede Kamer den casonan asina, normalmente ta sigui e conseho di Raad van Staten cu ta e organo consultative di Hulanda pa cu e tematica aki. Esaki ta un  logro hopi grandi pasobra Statuut ta data for di aña 1954. E cambionan den e Statuut desde 2010 no tabata hopi, y aworaki cu e amienda y e mocion cu PDR a entrega, ta mira un adelanto hopi importante pa e parlamentonan di Aruba, Curacao y Sint Maarten, pasobra aworaki por concipia un ley federal y entrega esaki na Tweede Kamer.

Parlamento di Aruba tin dos aña y mey si no ta mas, ta trahando riba un rijkswet pa reglamenta e geschillenregeling, thus ora bo tin diferencia di opinion cu Reino Hulandes cu bo por tin un huez imparcial pa bay over di bo caso. Te dia di awe nan a entrega esaki na e respectivo gobiernonan di Aruba, Curacao y Sint Maarten y te dia di awe nan no a entrega e concepto di ley akinan. Pero cu e logro aki di PDR via e mocion y amienda, nan mes como Parlamento por entregue directamente sin nodi di suplica gobierno di Aruba pa entregue pa parlamento. Esaki ta un adelanto hopi importante constitucionalmente mira, pasobra na final di dia como parlamentario ta tres derecho fundamental bo tin, ta cu bo mag di haci pregunta (staten vragen), e di dos bo tin mag di entrega amienda, pues ora cu gobierno presenta un ley bo tin mag di mehore, y e di tres ta cu bo tin mag di entrega leynan di iniciativa cu bo propio proposicionnan di ley. Pero ironicamente den e constelacion di Statuut thus pa loke ta trata nivel federal, eynan mester bay via Minister Plenipotenciario pero esey no ta traha. Andin Bikker ta spera cu pronto por avanza riba e gesto akinan y aunke e ta contento cu e 8 e kier haya e dos puntonan adicional pa 10, na caminda. 

Expresionnan haci den e articulo aki no necesariamente ta refleha opinion di ArenaPoliti.co