PUEBLO TA KERE MIKE EMAN AINDA? 

ORANJESTAD--  Durante tatamento di presupuesto di 2017, lider di MEP Evelyn Wever-Croes a cuestiona si por confia minister Mike Eman ainda. 

“Mi kier ilustra djis cu 4 ehempel e character di Mike Eman y su gabinete. Pasobra esaki ta tipifica henter e gobernacion. Un partido cu a yega na poder puramente cu enganjo, y despues a lubida riba e promesanan falso y a lubida riba e pueblo. Durante e 7 anjanan aki a hoga e pueblo cu medida, un tras di otro. Un mas cruel cu otro. Anto awe, drentando anja di eleccion, kier core tira salbabida pa pueblo den e speransa cu tur hende ta lubida con nan a wordo maltrata pa Mike Eman y su gabinete. Lagami repasa algun di e promesanan falso.

Elimina BBO 3% 
Y awe e BBO ta na 3.5%, y sin lubida cu minister di finansas a anuncia cu e ABB di 7% ta na caminda. Esaki ta demostra cu sr. Eman no sa di kiko e tabata papia ora ela bisa cu lo elimina BBO, y awor ni por cumpli.

Baha prijs di awa y coriente “from day one”
No a baha e prijs ningun momento, pero ya dia 1 di oktober 2014 a hisa e tarifa cu 15%, debi na e aventura di sr. Eman di hedging. Henter mundo a gosa di rebaho di prijs pero Aruba so no, pasobra Mike Eman y Mike de Meza a bai hedge na prijsnan haltisimo, mustrando un total falta di vision y conosemento. Otro promesa NO cumpli.

Combati criminalidad
Nos tur ta corda e propaganda unda for di tras di un skina sr. Eman ta Sali y bisa cu e tin e vision y e tin e team, pero e realidad ta otro, e realidad ta cu criminalidad out of control. Otro promesa cu no por a wordo cumpli.

Bon relacion cu Hulanda
Sr. Mike Eman a priminti di lo mehora e realcion cu Hulanda, pero den realidad ta pleito tras di pleito nos a mira. Sr. Mike Eman ta e politico cu mas a pleita cu Hulanda, el’a yama Hulandesnan pa verkrachters, e Hulandesnan a yame pa bi-polar tienermeisje, y como cherry riba e bolo, Hulanda a manda un KB pa Eman y a nombra e gobernador p’e. Promesa NO cumpli.

Pueblo lo sa di husga ki tipo di persona sr. Mike Eman ta: campanja ta UN, goberna ta totalmente OTRO!

Sr. Mike Eman durante 7 anja a hinca un spade den curpa di nos pueblo, un spada cu a causa hopi dolor y sangramento, y awor, den anja di eleccion, e ta saca e spada un tiki y e ta yame “prosperidad comparti”. Nos ta content cu el’a cuminsa saca e spade un poco, pero e pueblo aki mester di hopi mas.” Tabata palabranan di lider di MEP Evelyn Wever-Croes na sr Mike Eman.

Expresionnan haci den e articulo aki no necesariamente ta refleha opinion di ArenaPoliti.co