Andin Bikker, lider di Partido Democracia Real, a splica den rueda di prensa cu PDR a trece dilanti atrobe e tematica di reverse mortgage, cu kiermen un hipotheek inverti.

Esaki ta aplicable pa personanan di edad cu a baha cu pension caba cu ta biba den un cas grandi y cu kizas nan esposo/esposa a fayece caba, nan ta biba nan so, pero nan pension no ta yega.

Si nan kier hipotheek nan cas banco ta bisa no debi na nan edad avanza y cu nan ta biba di pension y no ta den capacidad pa caba di paga un hipoteca tradicional y e ora ey no ta bin na remarca pa haya un hipotheek nobo.

Andin a bisa cu na Merca y na Hulanda nan ta studiando riba esaki y a bin un solucion cu nan yame reverse mortgage. Esey kiermen cu e balor di e cas cu ta liber di hipotheek por wordo usa pa cera un hipotheek nobo. Kico ta pasa ta cu tanto bal un hende tin su cas na hipotheek pero su entrada no ta jega pa luna. Anto e ora bo ta biba den un cas grandi cu ta rekeri mantencion, pero bo mes tur luna ta strogle cu bo placa no ta jega.

Cu e solucion akinan no tin nodi inventa e wheel di nobo. PDR ta weita cu tur parti di mundo nan ta aplicando esaki y PDR ta bogando pa esaki pa un par di aña caba, pero en todo caso e ta birando mas y mas actual segun cu nos poblacion ta avanzando den edad, pasobra loke nan ta yama vergrijzing cu ta un trend mundial, na Aruba tambe no ta desconoci pa nos, y esey ta pone nos comunidad riba retonan nobo, Andin Bikker a splica.

Expresionnan haci den e articulo aki no necesariamente ta refleha opinion di ArenaPoliti.co