Prome Minister Eman despues di a reuni cu gerente di Departamento di Cultura    

ORANJESTAD- Prome Minister Mike Eman a haci un bishita na Departamento di Cultura pa cera conoci cu e empleadonan y tambe reuni cu gerente pa discuti plan y ideanan cu tin riba tereno di cultura cu mester wordo ehecuta. Prome Minister Eman ta haya nos herencia cultural masha importante y ta haci tur loke ta posibel pa hiba nos cultura riba un nivel mas halto. El a trece su ideanan riba mesa durante un reunion cu gerencia y a scucha cu hopi atencion loke nan a trece dilanti. Despues di e reunion cu a dura mas di un ora, Eman a bisa di a haya cu esaki a bay den forma hopi positivo.

"Nos a repasa e temanan cu pa DCA tin prioridad na e momentonan aki. Nan ta entre otro riba tereno di modernisacion di e aspecto digital. Algo hopi importante pa un departamento cu ta comunica herencia cultural di Aruba tanto interno como externo y modernisando esaki por haci'e den un forma hopi mas eficiente. A haci algun trabou preliminario pa wak con yega na ideanan con modernisa henter e aspecto digital di DCA." Prome Minister y na mes momento Minister encarga cu Cultura a bisa cu a papia riba diferente programa cu ta wordo guia for di DCA pa promove cultura di Aruba. No solamente pa loke ta fiestanan nacional, pero tambe den yuda centronan di bario of otro plataformanan pa asina reinforsa cultura di Aruba. "E ambiente durante e reunion tabata positivo, mi a ripara cu tin un bon organisacion aki y e empleadonan ta masha dedica. DCA ta interesa pa bin cu cursonan pa sigui inverti den e forsa humano. Pa nos como gobierno esaki ta un prioridad y nos mester wak con nos por sostene e esfuersonan di DCA. Esey tabata e enfoke primordial di e reunion cu a bay hopi bon."

Expresionnan haci den e articulo aki no necesariamente ta refleha opinion di ArenaPoliti.co