Dia 25 januari venidero nos lo recorda nos libertador den feliz memoria Betico Croes. Un lider, estadista y fundador di nos prestigioso partido Movimiento Electoral di Pueblo MEP. Un partido social democrata cu a ser funda na anja 1971 cu semper a pone e ser humano central y a lucha pa nos pais ta liber. Pami ta un orguyo inmenso awe di ta forma parti di un partido cu un trayectoria y historia asina impresionante. Nos libertador pa nos ta un ehempel con pa lucha pa algo cu bo kier logra sin nunca entrega. E ta un inspiracion pa nos sigur. Pa ami mes como hoben ta un honor di ta riba lista cu nos libertador su yui homber Glenbert Croes. Destino a percura pa nos camindanan cruza y topa cu otro manera e tawata den pasado cu su tata y mi propio tata. Nos libertador a funda e partido MEP y awe nos partido a caba di cumpli 45 anja di existencia y sigur e siguente generacion tey pa carga esaki pa e proximo 45 anjanan. Despues di fayaecimiento di nos libertador Nel Oduber a lidera nos partido pa mas cu 25 anja y awor e ta wordo lider pa sra Evelyne Wever Croes.

Nos libertador tin su lugar special den nos pueblo y sigur ta nos tarea pa conserva su memoria y nos libertad cu tanto e la lucha pe. E Status Aparte cu nos tin awe no a bai facil, sin lucha y sacrificio. Hopi ta esnan cu a lucha hunto cu nos libertador. MEP semper a kere den un Aruba caminda mester tin progreso pa nos pueblo. Nos libertador tawata un hende hopi keri den e pueblo aki y a sa di uni henter un pais pa un causa, cual tawata nos libertad.

Riba e fecha natal di nos libertador nos mester recorda esaki cu gran aprecio y reconocimiento pa loke la haci pa nos dushi pais Aruba. Un pais liber, un pais cu nos a nace y lo keda biba y un pais cu tin su historia grandi di cual MEP y sigur nos libertador ta forma gran parti di esaki.

Historia di un pais no por ser cambia y nos como e futuro generacion mester educa nos hobenan y esunan cu ta bin despues di nos e importancia pa bo conoce historia di bo pais.

Pesey nos ta haci un apelacion na henter e communidad aki pa ban recorda y celebra dia di Betico Croes en grande dia 25 januari proximo. En conceccion cu esaki nos prestigioso partido MEP lo tin un celebracion grandisimo na Savaneta na e Cede di MEP na Savaneta riba e caretera principal. Marca e fecha aki den bo calendar cu lo ta dia 24 januari 2017 di 6PM pa 12 PM.  Lo tin presentacion LIVE di bandanan Tsunami, Buleria y JEON. No perde e gran evento aki! 

Expresionnan haci den e articulo aki no necesariamente ta refleha opinion di ArenaPoliti.co