Sabana Basora ta bay haya un caminda completamente nobo despues di mas di 50 aña    

ORANJESTAD – “Mucho escogencia nos no tabatin,” Minister di Infrastructura, Benny Sevinger a bisa na momento cu e caminda di Sabana Basora a wordo cera pa cuminsa cu trabounan di reconstruccion. E tabata referi na e hecho cu tabatin hopi trabou di infrastructura pa haci y e Parlamentarionan di Pos Chiquito tabata pone hopi presion riba Gobierno pa haci algo den e bario di Pos Chiquito, Sabana Basora y bisindario.

E mandatario ta admiti cu cada biaha durante tratamento di presupuesto tabata bini e pregunta ki dia ta drecha e caminda di Sabana Basora y na final di aña pasa e por a duna e grato noticia cu Sabana Basora a yega na turno pa un caminda completamente nobo. “Porfin nos por cumpli cu e peticion. Den e ultimo presupuesto fondo a wordo poni disponibel pa cual awe nos ta aki hunto cu Prome Minister Mike Eman pa duna inicio na reconstruccion di e caretera principal aki cu ta core di Pos Chiquito te Santa Cruz.”

Minister Sevinger a haci un apelacion na habitante y usuario pa tene un poco pasenshi pa e trabou riba e caminda, cual lo ta uno basta grandi mirando cu mester traha un fundeshi nobo. Esaki ta nifica cu durante mas cu 3 luna e caminda di Sabana Basora ta poco accesibel. El a splica na mesun momento cu parti di e fondo a bini for di e presupuesto di pais Aruba y a bisa cu tin varios biaha mas unda cu drecha caminda, manera na Seroe Biento, Esmeralda, algun caya den Pos Chiquito mes, Santa Cruz, Savaneta, etc., y sin lubida e popular plateaunan, cu ta yuda reduci velocidad principalmente den areanan residencial.

David Britten, di BIC NV di Thiel Corp., ta e persona encarga pa supervisa e proyecto di reconstruccion caminda di Sabana Basora. Britten a splica cu nan a gana e proyecto aki via un destaho publico na final di 2016. E trabou aki specificamente ta cuminsa un poco panort di rotonde di Pos Chiquito y ta yega te na e crusada cu ta bay pa Santana di Sabana Basora, cu ta un distancia di un poco mas di 1 kilometer. Ta torno henter e caminda, pa pone un fundeshi nobo, pa despues pone asfalt, cu su banchi na cada banda y un meter di berm cu asfalt riba dje pa proteha e infrastructura completo. Segun e schedule, e trabou tin un duracion di casi 4 luna. “Nos ta bay traha hopi eficiente, pa e habitantenan sinti menos molester posibel. Un trabou di e grandura aki ta trece hopi molester, mas ainda door cu e caminda aki ta un ader hopi uza pa e bisindario y esnan di Santa Cruz, ya cu e infrastructura di Green Corridor ta conecta Santa Cruz directamente riba e caminda aki.”

Ta debi na e importancia di e caminda di Sabana Basora cu BIC NV Thiel Corp., lo pone tur makinaria y ekipo disponibel pa caba cu e trabou na tempo. Mientrastanto a yega na un palabracion cu DOW cu den oranan di atardi e caminda mester ta accesibel pa habitantenan, pa yega nan cas cu menos molester posibel.

Na mesun momento el a menciona cu e caminda aki tin dos complicacion grandi cu ta e desague banda di rotonde di Pos Chiquito, unda tin basta awa ta keda para. BIC NV tin un solucion pa esaki, y ta trahando un plan pa mehora e situacion. Un otro problema ta cu riba henter e trayectoria aki tin mas cu 20 “wegkruisingen”cu mester wordo poni, cualnan ta destina pa e companianan di utilidad y DOW. 

Expresionnan haci den e articulo aki no necesariamente ta refleha opinion di ArenaPoliti.co