Profesionalnan cu a haci un tremendo trabou na tur 4 compania    

Durante conferencia di prensa di plataforma politico POR, Otmar Oduber a gradici tur e profesionalnan, personanan cu a fungi como comisario di diferente companianan estatal di Pais Aruba.

Oduber a menciona cu siman pasa Gobierno a dicidi di retira practicamente tur e comisarionan di NVnan cu tabata cay bou su responsabilidad, esta Arubus, ANSA y ATA SG. E personanan aki a wordo nombra a base di nan experticio, di nan conocemento y e confiansa cu Gobierno a deposita den nan persona. Practicamente tur e nombracionnan aki a tuma lugar hunto cu Secretaria di Conseho di Minister y Conseho di Minister automaticamente ta na altura di tur nombracion. Mirando esaki toch tabata un sorpresa cu 6 luna prome cu un eleccion a tuma e decision di retira personanan cu e propio Gobierno y no solamente Oduber como minister a nombra/aproba y algun di nan pa un termino basta largo caba.

Repasando e NVnan, Oduber a indica cu ANSA, cual ta esun mas recien ta uno sumamente exitoso unda cu e Hunta di Comisario a haci e trabou debido pa por tin un compania hoben cu a sa di genera ganashi unda cu despues di mas di 27 aña por a adkiri un surveillance system, un radar pa control di trafico aereo na Aruba. E radar aki ta den proceso di instalacion hunto cu Setar y e compania internacional cu ta pone sitenan tur rond di Aruba. Ta trata di un inversion cu ta posibel dor cu a privatiza e entidad aki.

Straño ta cu e unico persona di e comisariado di ANSA cu no a haya retiro ta e persona cu ta trahando cu e actual Minister na e momentonan aki .

Pa loke ta ATA SG Otmar Oduber a bisa cu e instancia aki a prueba su mes. Den 5 aña y mey di existencia no solamente e ta hopi exitoso. Rapportnan internacional como local ta mustra cu den ultimo 6 añanan Aruba e crecemento economico a depende practicamente 100% riba e crecemento den turismo. Tambe a genera mas di 34 miyon Florin di entrada extra pa caha di Gobierno. Esaki ta un refleho tambe di e gran trabou cu e comisarionan a haci den ATA SG.

Papiando di AAA, Otmar Oduber a bisa cu aki no por a misho cu e comisarionan mirando cu tin un convenio cu Schiphol. Aki tambe Oduber a gradicinan pa e trabou cu nan ta realizando unda a hasta finaliza un prestamo miyonario cu a tuma lugar den añanan 90 y cu ta produci awe un entrada adicional di 8-9 miyon Florin pa aña pa Gobierno, fuera di tin un aeropuerto sumamente exitoso.

Otmar Oduber a gradici tur e comisarionan cu a duna nan tempo pa haci un tremendo trabou pa Pais Aruba y ta spera cu e paso cu Gobierno a tuma 6 luna prome cu eleccion no lo ta pa pone man riba e placa cu tin den e NVnan.

Miembro di POR a bisa cu e ta spera cu Gobierno coregi loke a tuma lugar cu ATA cu ta wordo regi pa leynan cu ta stipula con ta nombra y con ta retira comisarionan y e forma cu e retiro aki a tuma lugar ta un forma illegal. Nombracion di tanto presidente di e hunta di ATA como tambe e miembronan cu ta wordo nomina pa AHATA pa ley mester tuma lugar riba conseho di e hunta, pero den e caso aki Gobierno a bay over na simplemente retira

Finalizando Otmar Oduber a declara cu tur pregunta cu por tin riba e departamentonan por wordo busca na cada instancia y 3 di e 4 NVnan aki ta sumamente exitoso y tur 4 ta wordo maneha na e mihor forma cu ta posibel, cual ta wordo mira a traves di e diferente rapportnan anual cu tur ta bay pa Parlamento y CAD tambe, contrario na otro companianan estatal. “Un biaha mas, masha masha danki na tur e profesionalnan cu a dedica nan tempo na e companianan aki”.

Expresionnan haci den e articulo aki no necesariamente ta refleha opinion di ArenaPoliti.co