80 cent di cada florin mester bay pa paga debe. 

Siman pasa Minister Bermudez a bin duna cuenta den Comicion Financiero di Parlamento riba presupuesto 2015 y e rapport di CFT. E presupuesto pa 2015 no ta cla ainda, pero Minister Bermudez a presenta algun cifra cardinal di e presupuesto. Asina e mandatario a duna di conoce cu den 2015 gobierno tin un necesidad financiero di mas di 300 miyon florin. Esaki ta e placa cu Gabinete Eman mester bay fia riba mercado internacional pa por haya lora gobernacion. E deficit pa 2015 ta na 183 miyon y gobierno lo mester paga 202 miyon florin na gasto di interes. E debe a yega 4 mil miyon florin y di cada florin 80 cent di Pueblo mester bay pa paga debe. Mester remarca cu e suma aki no ta inclui e debenan di proyectonan di PPP.

Ta bon pa sa cu na 2009 nos debe tabata na 2,1 miyon y di cada florin un average di 40 cent di Pueblo tabata bay pa paga debe. Segun investigacion di IMF, pa un economia manera esun di Aruba di cada florin 35 pa 40 cent por bay pa paga debe. Asina cu bo surpasa e situacion na unda cu di cada florin 60 cent ta bay pa paga debe, esaki ta stroba y te hasta ta stanca e crecemento economico di bo Pais. Nos Pais na man di Gabinete Eman mester fia mas di 300 miyon florin pa 2015 y ta drenta den e situacion na unda cu mas di 80 cent di cada florin ta bay pa paga debe. E situacion aki no ta sostenibel y ta causa danio na e economia di Aruba. E cifranan presenta pa Minister Bermudez ta splica dicon e economia di nos Pais no ta draai mesun bon cu e propaganda di Gabinete Eman ta sugeri.

10 februari 2015

Expresionnan haci den e articulo aki no necesariamente ta refleha opinion di ArenaPoliti.co