Den contract nobo firma ayera cu ELMAR
12 mil punto di luz existente y nobo rond Aruba ta haya LED

ORANJESTAD – Gabinete Mike Eman II a firma ayera mainta cu e compania local di utilidad Elmar N.V., un contract nobo di iluminacion publico. E ta nifica cu pais Aruba ta bay completamente riba sistema LED cu ta hopi mas eficiente cu esun actual. E reduccion di 30% den gastonan ta algo cu Gobierno a dicidi pa bolbe inverti den e comunidad dor di amplia e red di puntonan di luz publico rond di henter e isla. Di e manera aki Gobierno ta cumpli cu mas di un di su metanan principal, entre nan conversion na consumo di energia mas sostenibel y miho calidad di bida pa ciudadanonan.

E acto a tuma luga den sala di prensa di Gobierno di Aruba den presencia di medionan di comunicacion. E contract a keda firma pa director di ELMAR N.V. a firma ing. Robert Henriquez; Minister di Asunto General, Ciencia, Innovacion y Desaroyo Duradero Mike Eman; Minister di Economia, Energia, Comunicacion y Medio Ambiente Ing. Mike de Meza y  Minister di Desaroyo Teritorial, Infrastructura y Integracion Benny Sevinger, bou di cual e departamento di DTI ta cay.

E director di e compania di electricidad a duna di conoce cu esaki ta un proceso cu a tuma su tempo pero awo a yega na e punto cu por bisa cu Aruba completo ta bay haya luznan LED. A cuminsa un seis siman atras caminda ya caba tin poco mas di mil punto instala, mientras cu e restante pa completa e suma total di 12 mil punto di luz, ta bay keda completo durante e proximo dos aña. Segun ing. Henriquez, esey ta duna un idea di e magnitud di e proyecto. “E ta un proyecto grandi pa Elmar y pa Aruba.”

E contract nobo ta refleha cu e cambio cu e tecnologia nobo ta ofrece. Ta cambia e luznan geel conoci como HPL pa luznan di LED cu ta uza un tono mas blanco y briyante, mas duradero y cu ta consumi hopi menos energia. Esaki ta pone cu e gastonan anual di DTI pa iluminacion publico ta baha dor cu no tin mester di mes tanto mantencion y por bay over na pone puntonan adicional den bario y cayanan caminda habitantenan tin mester di mas of no tin luz publico mes. Un total di 3.000 punto nobo di luz ta bay keda instala.

Prome Minister Mike Eman ta sumamente satisfecho cu e logro aki. El a comenta cu atrobe Aruba ta marca pauta riba tereno mundial pareu cu ta percurando pa un miho calidad di bida pa e pueblo. “Mi no ta kere cu tin hopi pais na mundo cu tur e iluminacion publico ta basa riba e principio di LED. Esaki sigur ta un contribucion mas na e pasonan cu Aruba ta tumando pa posiciona como lider den direccion di conversion pa energia sostenibel y un manera di consumo eficiente di energia, na mundo.”

Expresionnan haci den e articulo aki no necesariamente ta refleha opinion di ArenaPoliti.co