Minister di Asuntonan Economico, Comunicacion, Utilidad y Energia, ing Mike de Meza a reuni cu representantenan di Philips riba diabierna. E reunion aki a wordo atendi tambe pa Prome Minister Mike Eman como tambe Minister di Integracion, Infrastructura y Desaroyo Urbano, Benny Sevinger, y representantenan di sector energetico di Aruba. “Na april 2014 Gobierno di Aruba a firma un Memorandum of Innovation cu Philips,” Minister Mike de Meza a splica. “Awe nos ta yama bon bini na un representante di Philips cu lo percura pa ehecucion di e ciclonan siguiente cu a wordo acorda.”

E Memorandum of Innovation cu Gobierno di Aruba y Philips a firma aña pasa tin como fin pa sondea posibilidad y oportunidadnan pa traha hunto riba terenonan unda cu introduccion di innovacion lo contribui na aumenta eficiencia y reduci e consumo di energia na Aruba, specificamente den e area di iluminacion. E ehecucion di e Memorandum of Innovation ta complementa e trabaonan cu ta tumando luga den conexion cu e plan di inversion di gobierno, cu ta inclui e desaroyo urbano, infrastructura, energia, y revitalisacion di centronan di cuidad y e barionan. “Philips ta uni su mes asina na e grupo di partnernan strategico di Aruba,” Minister Mike de Meza encarga cu energia a anuncia.

E reunion di diabierna tabata pa discuti dos ciclo di e Memorandum of Innovation, esta iluminacion interior di edificionan di gobierno y sitionan iconico. Philips a haci un sondeo profundo di e situacion di iluminacion den edificionan di gobierno y con pa haci e uzo di coriente mas eficiente. Minister de Meza a splica cu “e compania multinacional a presenta su plannan pa e proceso completo pa “retrofit” edificionan di gobierno y baha uzo di coriente pa iluminacion”. Retrofit ta encera inversionnan pa mehora eficiencia di edificionan y casnan.

Pa loke ta trata e sitionan iconico, den e caso aki specificamente a combersa tocante e “Welcome Plaza” na waf di Oranjestad y “Plaza Padu”. E ultimo plaza ta forma parti integral di e revitalisacion di Oranjestad y ta keda patras di Bestuurskantoor entre monumentonan historico di nos capital.

Philips ta bay introduci tecnologianan eficiente pa e edificionan di gobierno cu ta resulta den reduccion significante di gastonan di coriente. “Den teoria loke gobierno por spaar na uzo di coriente den su mesun edificionan por facilmente financia e iluminacion di e proyectonan di e dos sitionan iconico menciona anteriormente,” Minister Mike de Meza a splica. Philips su mision ta pa mehora bida di e ser humano pa medio di innovacionnan significante y esaki nan ta refleha den e Memorandum of Innovation cu e proyectonan en cuestion.

E Memorandum of Innovation ta consisti di cuatro area cu a wordo investiga profundamente durante e ultimo aña. A base di e investigacionan Philips a comberti su mes den un partner strategico pa Aruba den reduccion di uzo di energia y na final di dia ta contribui na e meta pa Aruba yega na 100% independencia di combustibelnan fosil pa produccion di awa y coriente.

E proyectonan cu ta wordo desaroya hunto cu Philips ademas ta permiti pa Aruba bira un showcase regional pa e compania aki su productonan innovativo, como tambe lo sirbi como aun centro di excelencia pa Philips desaroya y test productonan y practicanan sostenibel.

Expresionnan haci den e articulo aki no necesariamente ta refleha opinion di ArenaPoliti.co