Diahuebs ultimo a tuma lugar e reunion relaciona cu projecto di hospital cu fraccion di MEP a pidi mas cu un anja pasa. Remarcabel ta cu for di cuminsamente nos a cuestiona ful e proceso dudoso y no transparante y a haye ta necesario cu e Minister en cuestion mester bin parlamento pa rindi cuenta. Hecho ta cu tin un cantidad di irregularidad cu a tuma lugar entre otro cu e bidding mes , exclushon di salanan di operacion y esakinan mester a wordo discuti.

Pa bai mas den detayes e proyecto di renobacion y expansion di dr. Horacio Oduber Hospital a wordo aproba riba 9 januari 2013 aproba pa parlamento pa un suma di Afl. 252 miyon florin. E proceso di destaho a continua entre 2 compania Arellano y Bouygues. Finalmente e proyecto di renobacion y expansion di dr. Horacio Oduber Hospital a wordo otorga na e compania Arellano pa Afl. 249.9 miyon, cual compania tin menos experiencia cu otronan y a ofrese inicialmente e prijs di mas halto. Esaki caba tawata un punto di cuestion. Ademas a resulta cu partinan vital di un hospital, manera sala di operacion, NO ta inclui den e proyecto di renobacion y expansion di dr. Horacio Oduber Hospital. Mester enfatisa cu pa inclui e partinan vital aki, mester aloca mas fondo cu e suma aproba anteriormente, cu ya caba a wordo surpasa. Esaki ta un motibo cu automaticamente ta crea aun mas duda y cu e proyecto di renobacion y expansion di dr. Horacio Oduber Hospital mester wordo para, te despues cu Parlamento duna su aprobacion pa e sumanan adicional

E diferente motibonan a pone cu fraccion di MEP huntu cu fraccion Democracia real kier haya claridad di full e proceso y relaciona cu esaki a hasi entrega di un mocion pa urgi gobierno pa institui y presenta e feitenonderzoek independiente den termino di 2 pa 3 siman aki na Parlamento prome cu por dicidi riba e aprobacion di un suma adicional. Fraccion ta di opinion cu e transparencia a laga di desea y cu pueblo merece di por wordo bon informa na kiko su placa ta bai cual ta motibonan suficiente pa entrega di e mocion.

Expresionnan haci den e articulo aki no necesariamente ta refleha opinion di ArenaPoliti.co