Durante di e reunion publico riba e topico di otorgamento di e "meerwerk" na e compania mafioso Bermello, cu e unico proposito pa ehecuta esaki sin destaho publico, tanto Benny S. como Alex S. un biaha mas a recuri na e caminda di gañamento.

Benny S. a bay mas leu di trece varios asuntonan padilanti cu ta basa riba idiotesnan cu por sali solamente for hendenan cu tin cos di sconde pa tapa nan erornan y/o actonan coruptivo.

*Tanto Alex S. como Benny S. a referi na un rapport cu a ser traha riba mi peticion na aña 2002. Deliberadamente ningun di nan dos ta haci mencion cu tin un otro nota cu ta desbarata e ponencia di dicho rapport. Den e contra-nota aki a ser argumenta y substancia, cu varios cifranan den e rapport ey no ta klop y hasta cu ta usa cifranan incorecto. Y alabes cu e rapport cu Benny S. y Alex A. ta referi na dje, a wordo traha cu e miras explicito pa haci un "vernieuwbouw". E contra-rapport aki tambe sr. Benny S. y Alex S. mester tin, pero deliberadamente no ta usa. Nan por pidi esun cu a dunanan un copia di e rapport di 2002, pa facilitanan tambe cu un copia di e contra-rapport.

* Ambos minister kier manipula e opinion publico cu e rapport di 2002, pero deliberadamente ta ignora un rapport cu AIB mes a traha encuanto ehecucion di un hospital nobo. E rapport ta carga e titulo: " Discussie-nota financiering nieuw ziekenhuis (aangepast)” di 30 di juni 2007. Riba pagina 3 ta wordo exponi cla y raspa door di entre otro sr. Frensel Giel cu e sitio actual no ta adecuado pa un hospital y ta duna un splicacion amplio mas o menos na unda e hospital nobis nobis lo mester bini. Unda mi persona tabata tin den mente  construccion di e hospital nobo aki na San Barbola, lo a cumpli na cabalidad cu loke AIB a conseha nos. Ta bon pa haci mencion cu e hospital nobo aki lo a inclui Paaz, loke den e "vernieuwbouw" actual NO ta e caso, y cu conforme e calculonan di e tempo ey e hospital NOBO lo a costa 211 miyon florin. No manera ta e caso awor cu al final pueblo Arubano lo bay paga casi un BIYON florin. No ta wega!!

* Den varios cacofonia di parti di fraccion di AVP y den esun di tanto Alex S. como esun di Benny S., ta bisa cu a ofende hendenan profesional y integro, etc. cu tin den AIB/SOGA etc., etc. Nan ta haci e.o. mencion di e proyecto di Dump y di Imsan, na unda ta wordo bisa cu tin cosnan straño a tuma lugar. Atrobe deliberadamente ta keda sin menciona e hecho cu ta mesun hendenan di AIB tabata forma parti di e team cu a desaroya tanto Dump como Imsan. Ambos proyecto ta proyectonan den cuadro di FDA, na unda AIB mester a percura pa tur cos bay na ordo. Esey kiermeen cu si tin cosnan a bay robez, nan tambe mester ta complice. Ta p'esey mi kier a haci un peticion oficial y publico pa haci un "FEITENONDERZOEK" den ambos proyecto. Ami no tin nada di sconde. Awor e palabra ta na e fraccion di AVP pa bin cu un mocion cu e meta aki. Pues bin cu un "FEITENONDERZOEK" riba Dump, Imsan y henter e proceso di otorgamento di e "vernieuwbouw" di HOH. Awor no "chicken-out"!!

* Benny S. alabes a bin cu e insinuacion cu nos lo tabatin un cumprado caba pa e tereno unda HOH ta situa awor. Mi ta rete pa menciona e nomber di e compania hotelero cu ami lo tabata tin e intencion pa bende. Esaki ta un mentira flagrante cu solamente por sali for di un mente maligno. By the way, esunnan cu a haci mencion di cu mester bende e tereno, ta mesun "handlanger" di e mesun Benny S. den e proyecto corupto di "vernieuwbouw" di HOH, esta atrobe AIB. Benny S. ta lubida di menciona cu e 27 miyon cu segun AIB (pag. 8 di e rapport di AIB di 30 di juni 2007) lo por a haya pa e tereno lo a ser INVERTI den e proyecto di e hospital nobis nobis, y no manera awor cu e 40 miyon cu gobierno a haña di SOGA pa e tereno di hospital, a ser regala na financistanan di nan campaña.

Mi ta ripiti cu den e proyecto di "vernieuwbouw" di HOH tin hopi cos "fishy" a, y ta tumando lugar. Tempo lo bay dunami razon. Awor ta busca un culpabel den HOH, y ya caba ta bayendo den un direccion, pero ta lubida cu mester bin cu un bon splicacion con bin a tarda mas di un aña y mei pa bin cu e solucion pa e problema di e OK.

Gerencia di HOH na augustus 2013 a notifica Gobierno riba esaki, pues mas cu 9 luna PROME cu e contract corupto cu Arrellano a wordo firma. Esnan cu no a reacciona riba e advertencia di e gerencia, cu a haci loke ta nan deber, ta e culpabelnan mayor y mester carga e responsabilidad y saca nan conclusion.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 27, 2015

Expresionnan haci den e articulo aki no necesariamente ta refleha opinion di ArenaPoliti.co