Minister Mike de Meza: Nos ta contento di mira alegria riba cara di habitantenan cu nan bario haya iluminacion
Miho calidad di bida pa pueblo ta importante pa Gabinete Mike Eman II.
ORANJESTAD – Despues cu bou di Gabinete Mike Eman I, a keda dicidi hunto cu Utilities Aruba NV y ELMAR pa hiba mas luz den barionan, bou di e actual Gobierno a bay mas leu pa cambia y pone en total total 12 mil luz LED rond Aruba. A toca turno diahuebs ultimo na Sero Grandiweg pa haya iluminacion, ya cu nunca antes tabatin luz den e caya aki
Minister di Economia, Comunicacion, Energia y Medio ambiente kende su cartera ta inclui companianan di utilidad, ing. Mike de Meza, diahuebs anochi a wordo ricibi cu brasa y sunchi door di habitantenan di Sero Grandiweg, unda cu Gobierno hunto cu ELMAR a cuminsa cu implementacion di e programa “Luz den Bario” cu e meta pa mehora calidad di bida pa e habitantenan. “Cu esaki nos a logra un cambio y mehoracion pa un bario, cu ta na curason di mi colega de Meza,” Prome Minister Eman a bisa na momento di introduci su colega pa hiba palabra durante e ceremonia.
E proyecto di luznan LED den Bario ta posibel dor di cooperacion di varios ministerio, instancia y departamentonan di gobierno y companianan di utilidad. Cada bes cu e iluminacion yega un bario, Minister de Meza ta splcia cu por mira un alegria grandi entre e bisiñanan. “E ta nifica cu teniendo iluminacion pa nan mes, nan yiunan y den e bario ta duna mas siguridad. Esaki tambe ta e programa cu Prome Minister desde Gabinete Mike Eman I a pone riba mesa, no solamente pa drecha e centronan di ciudad, pero yega te na e barionan, principalmente cerca esnan di menos di entrada cu nunca tabata parti realmente di desaroyo di e pais. Esaki tabata un di e programanan cu un prioridad sumamente halto riba agenda di nos Prome Minister Mike Eman.”
Pa ilustra con e Gobiernonan cu el a forma parti di dje a bin ta trahando pa pueblo, a recorda con a mehora Juwana Morto Complex, un bario “cu tabata hopi deplorabel, hopi decai.” E situacion aki a pone cu e bario tabata e prome pa wordo renoba, ya cu e no tabata un compleho di cas cu no tabata adecua pa habitacion. “Awe despues di algun aña por mira e desaroyo cu a tuma luga y no a caba. Ainda nos ta trahando poniendo luz den e areanan rond di Juwana Morto Complex cu si a haya tur su infrastructura necesario. Nos ta sinti nos mes bon, pasobra esaki ta e diferente piedranan di e puzzel cu nos ta hinca den otro pa na final mira cu Aruba completo, di centro di ciudad te den barionan di esnan di menos entrada e desaroyo ta yega te na nan porta di cas.” No solamente ta mehora infrastructura pa drecha nan calidad di bida, pero tambe a mehora entradanan pa nan por hiba un bida respeta.
ELMAR NV y Utilities Aruba NV ta empresanan bou maneho di Minister Mike de Meza. Na momento cu Prome Minister Eman a haci un apelacion na Minister de Meza pa ehecuta e programa “Luz den Bario”, e mandatario mesora a cuminsa traha hunto cu ELMAR pa mira con por yega na mas tanto iluminacion den barionan. Pero, Minister de Meza a bisa, nos mester sigui e maneho di sostenibilidad y a dicidi pa introduci luznan LED cu ta hopi mas eficiente. “Door di e eficiencia di e luznan aki, el a permiti nos cumpra mas luz pa crea 3 mil punto di iluminacion nobo rond Aruba, ademas di 9 mil luznan bieu di caya cu ta bay cambia,” de Meza a bisa.
Expresionnan haci den e articulo aki no necesariamente ta refleha opinion di ArenaPoliti.co