Mientras hopi ta culpa Arthur Dowers pa e ola di criminalidad cu ta costando hopi bida na Aruba, nos ta di otro opinion. Na principio por a culpa Arthur Dowers pero awor por constata cu e pober no por yuda.

Cu su arogancia y ignorancia, el'a boycotia tur proyecto existente den nos pais manera e helicopter y radar. Cu su arogancia y ignorancia ela nenga tur conseho cu a wordo duna na dje. Ela crea e ambiente ideal pa criminalnan fiesta te cu nan a tuma over.

MIKE EMAN
Pero e culpabel principal di tur e mortonan cu a cai ta Mike Eman. Pa su cobardia y falta di tuma accion, ela keda tene man riba e cabes incapas di Arthur Dowers. Pa cobardia di Mike Eman y su falta di convivencia cu pueblo di Aruba, ela pone interes di su partido prome cu interes di pueblo. Su cobardia a impidi'e pa scucha dolor di pueblo.

PARLAMENTARIONAN DI AVP
Esunnan cu ta co-responsabel pa e insiguridad den nos pais ta e 12 parlamentarionan di AVP. Nan tin miedo di carga nan responsabilidad. Nan tin miedo di tene Arthur Dowers responsabel. Nan cobardia ta hasi cu ningun accion ta wordo tuma y Aruba ta birando dia pa dia mas insigur.
Mas aun nan ignorancia of arogancia ta strobando henter e Parlamento pa cumpli cu e tarea cu pueblo ta paga pe: controla gobierno y ora un minister no ta funciona, mester expresa desconfiansa contra dje. Nan no kier pa oposicion haya e reunion cu nan a pidi pasobra nan tin miedo cu un mocion di desconfiansa wordo entrega.
Tur 100 mil cuidadano na pais Aruba ta conbensi cu Arthur Dowers a faya y cu e no por cu e cargo. Hasta coleganan minister di Arthur Dowers mes sa cu e no por cu e funcion di minister di husticia. E uniconan cu ainda no of no por kier acepta esey ta e 12 parlamentarionan du AVP. Tanto Baba Herde, Mervin Wyat-Ras, Jennifer Arends, Desiree Croes, Lorna Varlack, Clarisk Velasquez, Marlon Sneek, Melvin Tromp, Norman Roos, Donny Rasmijn y Jeffrey Kelly tin miedo y pues ta responsabel pa e insiguridad den nos pais!

Expresionnan haci den e articulo aki no necesariamente ta refleha opinion di ArenaPoliti.co