ORANJESTAD - Recientemente a circula un mensahe di e.o. oposicion den cual ta insinua cu Gobierno lo debe APFA casi 900 miyon florin. Minister di Finanzas, Angel Bermudez a desmenti esaki totalmente, “e mensahe aki ta falso y ta manipula e cifranan cu APFA a suministra recien den su relato di aña 2015”, asina e mandatario a sigura.

Sin embargo Minister Bermudez ta opina cu loke kisas ta e malinterpretacion, ta cu di e 2,5 BIYON florin na capital di pensioen cu APFA tin inverti total, un tercera parti, esta ± 875 miyon ta inverti den instrumento di Gobierno. 

E cifranan cu e mandatario di finanzas a comparti, ta e demostra cu e inversionnan cu APFA tin den Gobierno ta genera un entrada total di rendimento di 52 miyon florin pa aña (interes promedio 6,5%). “Esaki ta un entrada stabiel y halto compara cu e mercado actual, cual ta un contribucion importante pa e recuperacion di APFA y cu ta permiti APFA paga su pensionadonan!”, asina Minister Bermudez a sigui splica.

Segun e mandatario, e cifranan aki tambe ta inclui den e cuenta anual APFA y nan ta specificamente raporta den paragraf 3.1.1 bou di “Onderhandse Leningen” y den paragraf 3.2.1 bou di “Staatsobligaties” di e cuenta anual. Finalmente e mandatario a informa cu mester tene na cuenta tambe cu legalmente APFA mester inverti 60% di su capital localmente, mientras cu 40% e por inverti den exterior.

Expresionnan haci den e articulo aki no necesariamente ta refleha opinion di ArenaPoliti.co