Gabinete ME II: Paradera awo tambe lo conoce e beneficionan multiple di un MFA
ORANJESTAD – Exactamente un aña menos un dia despues di e apertura oficial di MFA Noord, diahuebs awo ta habri su portanan oficialmente pa publico MFA Paradera. Facilidadnan Multifuncional sin duda algun, ta figura entre e exitonan mas visibel y palpabel di Gabinete Mike Eman; y si esey ta cu apenas e prome den funcionamento. E vision di Gobierno, pa desaroya servicio publico den bario pa un nivel mas halto, ta un realidad cu ciudadanonan ta tuma cu brasa habri.
Esnan cu ya por a experiencia e diferencia cu MFA ta brinda na Noord, por y ta duna testimonio di e cambio grandi cu e ta representa den e manera con nan ta atende nan asuntonan personal; otronan no por warda pa un edificio similar por yega na nan distrito tambe. Un ambiente mas agradabel paso ta e MFA ta ofrece espacionan mas grandi, comodo, limpi y moderno; un experiencia mas placentero pasobra por haci mas cos, na un solo luga.
For di busca documentonan di Censo y pago plachi di number of belasting, te na renoba carchi di AZV of djis topa cu hendenan di bario pa bebe un koffie, tur esaki MFA ta ofrece y mas. Cada MFA ta sigui e mesun liña di pensamento caminda ta consulta e ciudadanonan di e bario pa indica kico nan tin mester y kico nan ta desea di mira construi. Basa riba esaki, un ekipo di profesionalnan local ta planifica, diseña y construi e facilidad. E resultado ta un centro cu grandi y chikito por haci uzo di dje y ta bon bini.
Espacionan pa reunion, presentacion cultural, exposicion di arte, estudio y investigacion, cafetaria y hopi mas ta inclui den e concepto. Tambe ta tene hopi cuenta cu e contacto cu naturalesa y un funcionamento sostenibel. Di e manera aki, ya caba miles a ripara con por keda cla djis den algun minuut bishitando MFA, con e rijnan a disparce y na su luga tin hopi espacio pa sinta y tambe pa parkeer.
Gabinete Mike Eman II ta invita henter pueblo di Paradera y Aruba completo pa atende e momento grandi y special cu ta apertura di MFA Paradera diahuebs 27 di september proximo den oranan di atardi. Tur hende ta keda bon bini pa drenta y admira tur e espacio y servicio cu MFA Paradera tin pa ofrece na e districto y henter e isla.
Expresionnan haci den e articulo aki no necesariamente ta refleha opinion di ArenaPoliti.co