Dia 13 oktober 2016 miles di hende a subi caya pa demostra na un manera pacifico contra e aumento drastico di criminalidad na Aruba. E comision pro siguridad cu a lidera e marcha a entrega un manifiesto na promer minister Mike Eman y tambe na minister di husticia Arthur Dowers. A keda accorda 3 punto cu gobierno lo mester cumpli cu nan di inmediato. Un di e puntonan cu gobierno mester a cumpli cune ta aloca 10 miyon florin pa combati criminalidad. Promer minister Mike Eman a firma e manifesto y a garantiza e commission pro siguridad y tambe e miles di persona cu a subi caya cu e lo cumpli cabalmente cu loke a keda acorda. Un biaha mas nos mester constata cu Mike Eman a bolbe ganja nos pueblo. Pa 7 anja largo nos pais a wordo goberna pa un promer minister cu NO ta tene su mes na palabracionan y ta ganja nos pueblo. Nos ta lamenta profundamente cu ainda gobierno no a pone mas placa disponibel pa combati criminalidad mirando cu e situacion desde 13 di oktober no a bira mihor sino a empeora. Nos a spera cu gobierno lo a tuma accion y manda un nota di cambio pa parlamento pa asina aloca 10 miyon florin pa minister di husticia. E siman aki un biaha mas Aruba a wordo azota pa mas atraco, mas ladronica y tambe joyriding di auto. Tambe tin un cantdidad di casonan caminda ilegalnan ta yega nos pais, te hasta animal ta wordo importa illegalmente y avioneta tambe ta baha illegal riba pista na aeropuerto. Ta parce cu e gobierno aki ta stimula illegalidad envez cu ta combati esaki. E situacion na Arba ta uno hopi serio caminda un gobierno e neglisha biniestar di nos pueblo y a crea pobreza y problemanan social hopi serio. Nunca antes Aruba a sinti su mes asina insigur caminda nos pueblo ta biba manera prisionero den nan propio cas.

Nos ta exigi di gobierno pa cumpli cu loke a wordo accorda pa asina evita mas accion. Na momento cu gobierno no kier duna oido na pueblo y ta neglisha tur esnan cu a subi caya y manifesta no lo keda nada otro pa sigui cu e accionan te ora gobierno recapacita y tuma accion pa garantiza nos pueblo nos siguridad.

Ta obvio cu e gobierno aki NO a cumpli cu nan plana di campanja y mas bien a tuma henter un pueblo haci. Promer minister NO tin control mas riba e pais y ta yegando e momento pa e gobierno aki hala un banda y laga otro haci e trabounan necesario. Nos pueblo simplemente ta sufriendo bao di e maneho di e gobierno aki y kier mira un cambio pa asina nos por biba den tur trankilidad!

Expresionnan haci den e articulo aki no necesariamente ta refleha opinion di ArenaPoliti.co