Si e instrumento di Parlamento no ta traha mas, pueblo ta sigui caya. Esaki ta palabranan di lider di Partido Democracia Real Andin Bikker, den rueda di prensa semanal.

Den e caso aki, pa loke ta trata combatimento di criminalidad, ta bira ocho aña total cu pueblo ta constata cu Minister di Husticia ta incapaz, cu e no tin un vision, no tin un plan, e no tin strategia pa combati criminalidad y caminda cu nos ta keda wak criminalidad ta keda aumenta.

“Aworaki mes a bay pa 56 atraco pa aña di aña 2013 cu tabata tin 33 y cada bez ta keda subi exponencialmente, e weekend aki so tabata tin tres, pa e fin di siman aki lamentablemente, Dios so sa cuanto por spera, anto e minister di husticia ta culpa tur hende, pero e no ta asumi su responsabilidad. E minister di husticia ta incapaz, e no tin vision, e no por cu e cartera akinan y no tin manera pa dune e señal akinan pasobra lamentablemente e fraccion cu ta sostene gobierno ta keda kere den dje, pero pueblo ta desprotehi y mester di proteccion, y e minister di husticia mester saca su conclusion”.

Andin Bikker ta sigui bisa cu varios biaha tin mocion den parlamento, ta presenta mocion di desconfianza, mocion di lamento cu tur tin e intencion y e mensahe cu e minister tin cu saca su conclusion, y e minister di su mesun banda di su propio iniciativa no ta realiza y ta tira culpa riba tur hende menos riba su mes, y no kier realiza cu e mes mester hala un banda.

Bikker ta haya cu di e banda akinan e trabao den Parlamento a bira sin sentido aworakinan y e ora ey mester subi caya.

“Nos a tuma nota cu tin un organizacion cu ta organizando un demostracion, un marcha, y nos en todo caso di parti di Democracia Real a purba tur loke nos a por den parlamento, nos ta duna sosten na e marcha akinan y nos ta haci un invitacion na nos militancia, nos miembronan, na nos votadornan pa nan tambe haci asistencia na e marcha akinan, pa mustra na un manera democratico y pacifico, cu e situacion aki ta inaceptable”, segun Bikker.

El a bisa tambe cu vooral pa recorda señor Mike Eman cu el a bay eleccion na 2009 canando den bario cu un cada bez cu un clip, cu ainda ta subi riba youtube,  caminda e ta bisa con nos pueblo ta sufriendo pa falta di vision pa combati criminalidad, y lamentablemente mester constata cu e mes a pone e minister di husticia eynan, cu tin nos pueblo desprotehi y constantemente e ta wordo protehi den parlamento, pasobra reunion ta wordo yama, etc., caminda e ta bin ta duna splicacion y 3 minuut so bo tin pa haci pregunta.

“ Yen di wega ta wordo haci. Siman pasa nan a yama un reunion a sabiendas cu mi persona tabata den exterior pa trabao. Mi a meld pa esaki y trece dilanti no obstante nan a yama reunion sin respeta reglamento di orden y tur e weganan aki pakico? Pa protehe e minister di husticia siendo cu ta pueblo mester di proteccion no e minister”, Bikker a bisa.

El a sigui splica cu si den Parlamento nan no por haci uso di nan derechonan constitucional, pa en todo caso duna un señal na e minister responsable cu no ta actuando conforme cu loke e pueblo ta spera di dje, y nan ta sinti nan mes desprotehi, anto ultimo instrumento cu ta resta nos aworaki ta bay den un demostracion.

Expresionnan haci den e articulo aki no necesariamente ta refleha opinion di ArenaPoliti.co