Diahuebs 13 oktober nos pueblo a sali masalmente y demostra cu nos pais por uni pa un causa cual ta nos siguridad. E situacion actual cu tin na Aruba pa loke ta trata criminalidad a sali for di man. No ta yegando casi 60 atraco y high season no a cuminsa ainda. E marcha cu a wordo organiza pa e commission pro siguridad y cu sigur a conta cu nos sosten tawata un marcha na su lugar. Tin hopi mas crimen na Aruba cu tambe ta wordo cometi manera ladronicianan di tereno di pueblo pa famianan yega na gobierno. Tur e abusonan aki mester wordo para. E pueblo aki a vota pa un Aruba mas sigur, e no a vota pa wordo atraca y maltrata den nan propio cas, nan no a vota pa ladronicia di tereno di pueblo. Nos pueblo a subi caya y exigi gobierno pone siguridad como prioridad. E gobierno aki a negisha siguridad di nos mesun hendenan y a pone nos como ciudadano di e pais aki biba manera prisionero den nan propio cas. Ta hopi lamentabel cu gobierno mes a keda man cruza y keda sin tuma accion. Ta tristo cu minister Dowers ainda NO kier accepta cu tin un problema serio cu criminalidad. Tanten e no kier accepta y reconoce esaki dificilmente e por haci algo pa alivia e situacion. Si no ta pa e pueblo cu a pone presion durante e marcha e gobierno aki NUNCA lo a pone siguridad di nos hendenan na promer lugar. Ta gracias na e pueblo cu a sali y demostra cu nan kier biba den trankilidad, promer minister  Mike Eman a compromete su mes cu e lo pone 10 miyon disponibel pa combati criminalidad. Awor e pregunta ta, con lo bai gasta e placa aki? Nos ta exigi di gobierno pa duna cuenta na pueblo unda ta bai inverti y con lo bai haci uso di e fondonan aki. Mescos cu minister Otmar Oduber a pone condicion pa minister Dowers con e lo usa e fondonan cu e la duna minister Dowers, nos pueblo ta exigi di minister Dowers pa duna cuenta con e lo usa esaki.

Na momento den un pais parlamentarionan cu ta sostene gobierno ta cuminsa insinua cu ta MEP ta orchestrando atraconan, nos sa con robez e direcion di nos pais ta. Ta increibel con hendenan por pensa di un manera asina. Mentenan putri so por bin cu insinuacionan asina baho y vil pero di fraccion di AVP no por spera nada otro. Un fraccion cu a defende disaster, un fraccion cu ta defende un aumenta di criminalidad, un fraccion cu NO ta convivi cu pueblo no por spera nada otro.

Atraco pa gobierno di AVP ta algo normal y ta pesey nan ta atende cu e asunto manera nan ta atende cune. E presion di pueblo awor ta bai sigui mas cu nunca. E rosea cayente di pueblo lo wordo sinti pasobra si ta riba caya mester subi pa haya oido di promer minister Mike Eman, anto e ora ta riba caya nos lo keda bai!

Expresionnan haci den e articulo aki no necesariamente ta refleha opinion di ArenaPoliti.co