Minister Otmar Oduber diahuebs mainta a sinta cu prensa pa clarifica algun insinuacionnan haci contra di su persona. E mandatario ta indica :"Semper ma para y lo sigui para pa transparencia, por haci mil y un intento pa kibra mi, pero berdad semper ta sali na cla."

E mandatario a tuma nota cu e insinuacionnan di e reportero recientemente awor a haya un tint politico na momento cu un miembro di parlamento den e fraccion di MEP a uza e mesun palabranan y tambe e mesun insinuacionnan contra di Sr. Oduber su persona.  Insinuacionnan cu te awor no tin base mirando cu na ningun momento por a presenta prueba.

Di otro banda Minister Oduber a presenta na prensa TUR e documentonan y informacionnan relaciona cu acusacionnan baho di un reportero cu den su opinion ta kere cu paso e tin un camara y un mic e lo por difama hende na su antoho. Por te hasta agrega cu e documentonan presenta ta documentonan cu Parlamento di Aruba a ricibi na multiple ocasion. Tempo a institui ATA Sui Generis, 5 aña pasa, ariba e logo di Aruba y riba con henter e proceso a cana.

Minister Oduber a inicia cu e documento di un registro di Camara di Comercio di un compania cu a keda funda prome di september 2002 yama Graphi-X and Beyond V.O.F. E compania aki a keda funda pa casa di e mandatario, di cual e ta considera cu e tambe ta doño automatico mirando cu nan ta casa "binnen gemeenschap van goederen". Banda di Sra. Oduber-Chung e compania ta di Natasha F. Roga y su pareha Sr. Ralph Maduro. Graphi-X and Beyond V.O.F. a keda den funcion te cu 12 di juni 2009 unda oficialmente a keda cancela. Riba e mesun fecha aki 12 di juni 2009 a lanta un compania "eenmanzaak"  Graphi-X and Beyond di Sra. Natasha F. Roga. Minister Oduber a mustra tambe riba e hecho cu e fecha aki ta prome cu eleccion y no tabata sa cu lo gana e eleccion ey ni cu su persona lo a bira Minister y pio cu ATA lo bira un Sui Generis y cu lo crea un logo oficial. Pero por mustra cu riba 12 di juni 2009 e "partnership" a keda finalisa. Dia 5 di September 2011,  Sra. Roga cu mas socio a lanta e compania Graphix and Beyond como un NV. Minister Oduber ta splica cu e compania di Sra. Roga a participa den un destaho publico na 2010 riba e logo di  Pais Aruba. Alabes e tempo ey e destaho publico no a tuma luga door di oficina di Minister, ni tampoco dor di ningun coordinador di Minister. Pero e proceso a tuma luga na Oficina di Turismo y e tempo ey esnan cu a guia e proceso aki ta un management team cu ta consisti di Sra. Astrid Muller, Sr. Fritz Israel cu a firma e carta den nomber di management team y tambe Sra. Gina Lopez cu ta casa di e ex consehero di Sr. Rudy Croes cu ta Sr. Urbano Lopez. Adicional por menciona cu e ambtenaar cu a keda encarga cu e destaho publico aki tabata Sr. Mario Arends, tur e personanan aki ta esnan cu a dicidi riba escogencia di e logo di Aruba. Sinembargo den e proceso di e destaho publico aki cinco compania a participa den dje.

Awor e mesun persona cu a gaba e maneho di Minister Oduber pa añanan largo y cual na varios ocasion a te hasta biaha cu e mandatario,  hunto cu su buikspreker liga na partido MEP, kier trece mentiranan y insinuacionnan ridiculo pa purba atacha integridad di e mandatario.

Minister Oduber a comparti cu su wela tabata bise Dios ta bisti pidjama pero no ta drumi! Cu hopi orguyo Sr. Oduber  por anuncia cu Central Acountans Dienst a termina su investigacion riba ATA. Esaki ta un tarea cu a keda duna for di aña 2014 dor di ex Minister di Finansas Juan David Yrausquin. Minister Oduber ta expresa cu e tipo di casonan asina ta na momento adecuado cu ora DIOS ta obra y e maldad di esnan rond di henter e obra malo lo no prevalece. Ta netamente na e momento di tur e insinuacionnan ta tuma luga, te hasta e Rapport di maneho di ATA lo papia pa su mes.

Expresionnan haci den e articulo aki no necesariamente ta refleha opinion di ArenaPoliti.co