STA CRUZ -- "Unda Mike Eman ta atrobe? Bo no ta tende nada mas di dje, solamente un rato dos siman pasa ora ela organisa un conferencia di 2 miyon florin pa e papia di su vision fracasa "green". Ta solamente ora e mester papia y alaba su mes, bo ta mir'e. Pa tur lo demas e ta keda scondi. 

CRIMINALIDAD
Unda e prome minister di nos pais a keda memey di e crisis di criminalidad cu Aruba ta bibando? Asesinato, 'drive by shooting', atraco arma, turistanan ta wordo horta tur dia. Ni e minister di husticia, ni e minister presidente di pais Aruba a mustra nan preocupacion ni siquiera convivencia cu comunidad. Acaso pa nan e degeneracion aki a para bira algo normal? Nos ta nenga pa acepta cu esaki ta e Aruba cu nos kier pa nos yiunan y nan yiunan lanta den dje. Nos kier un Aruba sigur pa un y tur!

CUIDO DI NOS GRANDINAN
E pleito mas recien entre minister "part-time" Alex Schwengle y SABA awor ta poniendo cuido di nos grandinan na peliger. For di informacion di trahadornan y directiva di SABA den Parlamento nos por conclui cu e forma sructural con minister Schwengle ta neglisha cuido di nos grandinan casi ta parse un abuso contra nos grandinan. Minister "part-time" Schwengle a demostra cu e no tin interes den cuido di nos grandinan. Y unda e prome minister di e pais aki a keda pa interveni? Pa bisa su "part-time" minister cu e mester stop di pleita! Cu en bes di paga miyones di florin na compania di mercadeo pa drecha su imagen, e mester hinca e placa ey den cuido di nos grandinan. Esey un pueblo ta spera di e prome minister di su pais! Nos ta nenga di acepta un gobierno cu ta abusa di su grandinan. 

PLEITO INTERNO DEN AVP
Den e pleito interno den AVP unda e lider di e partido a keda? E no por pone un paro na e pleitamento entre su minister Oduber y su vocero Andrade? Of acaso Mike Eman ta aproba e menasa na libertad di expresion cu su minister ta impone? Pasobra tanten cu e no actua manera un LIDER e ta aprobando tur locual ta pasando. Aruba no ta sali beneficia den e pleito aki! E forma swak con Mike Eman ta lidera su partido lamentablemente tambe ta refleha den e forma masha swak cu e ta lidera nos pais. 

Den tur e problema aki Mike Eman ta bon scondi den su Cocolishi. E no kier of e no por atende cu problemanan di nos pais. Mi ta urgi e doñonan di partido AVP, pone ordo y exigi di Mike Eman pa demostra maske ta un tiki liderasgo y stop e pleitonan interno y ban concentra riba e problemanan real di nos pais. Ban hasi e pais aki sigur atrobe pa tur cuidadano, ban baha costo di bida y controla prijsnan di comestibles, ban mehora e cuido di salud, cuido di nos grandinan y calidad di ensenjansa y ban crea empleo pa e mama y tatanan di famia cu no tin trabou. Pa nos di partido MEP eseynan ta prioridad, y no pleito interno y sigur tampoco conferencianan di 3 dia cu ta costa pueblo 2 miyon florin" lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co