Pa partido MEP e rol di e diferente fundacionan of departamentonan di gobierno cu ta atende cu e problemanan social den nos comunidad ta sumamente importante. Durante tratamento di Presupuesto 2015, Parlamentario Besaril a elabora extensamente den su disertacion di e importancia di e labor desplega pa "Bureau Sostenemi". En conexion cu e preocupacion expresa, miembronan di Fraccion di MEP den Parlamento a reuni e siman aki cu e directora y staff di e Bureau en cuestion.

"Bureau Sostenemi" a keda instala na 2005, despues di e labor y estudio desplega pa e stuurgroep AMK (Advies en Meldpunt Kindermishandeling) na 2004. E meta principal di e Bureau ta di combati abuso di mucha. E forma con e Bureau kier alcansa esaki ta por medio di:
* Registra e casonan di abuso di mucha
* Duna conseho den cierto casonan y
* Notificacion di e casonan.
Pues un punto central di notificacion pa loke ta casonan di abuso di mucha. Durante e bishita di Fraccion di MEP, e directora, sra. Tecklenborg, ademas di a pone enfasis riba e tareanan menciona, a elabora riba e "Follow Up" cu ta asina crucial entre e diferente instancianan social.

Un punto di preocupacion pa "Bureau Sostenemi" ta e cambio di ley necesario den nos Codigo Civil pa e departamento por funciona conforme e intencion pa cual e la keda instala na 2005. Parlamentario Besaril den su disertacion durante e tratamento di Presupuesto 2015 a elabora riba e legitimidad demostra pa "Bureau Sostenemi" den practica, pero cu mester ancra e legitimidad aki tambe den nos codigo Civil (articulo 243), pa garantisa un funcionamento optimal di e departamento.

Fraccion di MEP ta carga e speranza cu e demas Fraccionan den Staten y e Minister encarga cu "Bureau Sostenemi" tambe por yega na e mesun conclusion cu nan, pa asina ehecuta e cambionan necesario tanto pa un funcionamento optimal di departamento como na e bienestar di nos muchanan.

Expresionnan haci den e articulo aki no necesariamente ta refleha opinion di ArenaPoliti.co