E hecho cu schoolgeld no a wordo aumenta te 250 florin pa aña pero na 175 pa florin ta algo cu no mester wordo considera como un logro. Mas bien e ta bisa hopi di e situacion financiero actual cu Gabinete Eman no por cumpli manera debe ser cu subsidio na SKOA y ta pesei e tarifa no ta bai mas abou. Esaki ta di lamenta pasobra tratadonan internacional (di Unicef, EVRM aplicabel pa Aruba tambe) y nos constitucion ta stipula cu tur mucha tin derecho riba educacion nificando enseñansa gratis pa loke ta trata scol primario (kleuter y basis). Ta obvio cu mal maneho financiero ta hasta obstaculisa cu e tarifa di schoolgeld lo por keda cu prijsnan accesibel.

Realidad ta cu e aumento actual di 75 florin pa 175 florin (100 florin mas) con cu bai bin ta keda algo sumamente cuestionabel. Aparentemente a wordo argumenta na un promer instante cu e aumento ta necesario pa elevacion y mehoracion calidad di enseñansa. Mester enfatisa cu den principio e ta gobierno su responsabilidad pa percura pa e calidad di enseñansa ta uno cu ta keda halto y zorg pa placa no ta forma un barrera pa limita muchanan pa sigui scol.

E punto central di tur esaki ta cu e alumno no mester wordo limita den ningun forma cu su educacion menos wordo stroba door di placa. Basa riba tratadonan internacional fraccion di MEP a entrega un mocion
instruyendo Minister di Enseñansa pa hasi e estudionan necesario pa por implementa enseñansa gratis pa
kleuter y basis. Adicionalmente a pidi pa e minister en cuestion informa Parlamento dentro di cuanto tempo Aruba lo por logra esaki. E mocion aki a wordo sosteni pa e mayoria cu 19 voto! Pero accion ta papia mas fuerte cu palabranan pasobra den e caso specifico aki Minister di Enseñansa a demostra cu e no a hasi ningun ehercicio pero a solamente bai negocia un rebaho di 75 florin permitiendo un aumento cu ta keda drastico di 75 florin pa 175!

E hecho cu Minister di enseñansa a negocia un suma di schoolgeld na 175 florin y cataloga e aumento aki como un logro ta algo di condena! Siendo cu e propio Minister aki den pasado a declara cu bo no por tin aumento drástico sin mas. Un biaha mas nos ta wak cu e accionan di e minister aki ta contradeci e intencionan real. Ta di lamenta cu e Minister después cu e moción ariba menciona a wordo aproba unanimamente a dicidi toch pa ignora esaki y toch permiti un aumento di 100 florin!

Expresionnan haci den e articulo aki no necesariamente ta refleha opinion di ArenaPoliti.co