Tanto negativismo y frustracion no ta yuda nan cu nada
"Mi a tuma nota di un comunicado di prensa di minister Michelle Hooijboer-Winklaar cu un tono masha negativo y den cual e ta saca masha hopi frustracion dirigi contra mi persona. Esaki despues cu ami a cumpli cu mi tarea como parlamentario pa hasi e minister preguntanan relaciona cu e seguro di estudio di studiantenan na Hulanda. Mi a keda masha asombra cu e tono hopi frustra di e comunicado, pero mi mester admiti si cu mi a spera un tipo di reaccion asina, pasobra tur biaha cu e minister tin algo di sconde, e ta reacciona di e forma aki", lider di MEP Evelyn Wever-Croes a laga sa.

Siman pasa lider di MEP a urgi e minister pa reacciona riba acusacionnan cu a sali den medionan di comunicacion pa mas di tres siman, den cual ta cuestiona e integridad di e minister, y iregularidadnan den e destaho publico pa cu e pakete di seguro ey.

"Pesey mi a pidi e Minister pa duna nos claridad tocante e destaho, por ehempel kennan tur a entrega oferta, a base di kiko e compania InsureToStudy a gana e bidding, y nos kier mira e scoring sheet y henter e dossier di e destaho. Te awe e minister no a contesta ningun di e preguntanan aki, y e frustracion y negativismo den su comunicado awor si ta ponemi pensa cu e tin algo di sconde, sino e lo no a reacciona di e forma ey. En todo caso, mi ta duna e minister algun dia ainda pa e cumpli cu su deber constitucional y contesta mi preguntanan por escrito, sino mi ta bai aserca Ministerio Publico pa hasi un investigacion. Pasobra no por ta asina cu pa 3 siman largo medionan di comunicacion ta cuestiona algo asina serio, y e Minister ta scohe pa keda keto. 

Pueblo di Aruba ta fada caba di tanto escandalo entorno e ministernan, y pesey mes nos mester di reglanan di integridad, pa asina por controla ministernan mihor".

“Ademas mi a trese bou conosemento di e minister cu varios studiante na e momento aki no ta segura. Nan a bai dokter e siman aki y a wordo informa cu nan mes mester paga of mayornan mester manda placa, pasobra e cambio di seguro ainda no ta regla. Esaki ta perhudica nos studiantenan inecesariamente, y riba esaki e minister no a duna ningun contesta tampoco”.

"Mi no ta bai reacciona riba e contenido mes di e comunicado di minister Michelle Hooijboer-Winklaar, pasobra mi ta laga e negativismo y frustración pa e minister. Ami tin interes di e studiantenan na prome lugar, y den e lucha pa bienestar di e studiantenan, no tin lugar pa e negativismo ni frustracion di Michelle Hooijboer-Winklaar",  lider di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co