Nos a tuma nota di un comunicado unda cu lider di fraccion di AVP ta purba steun na su unico speransa den Tweede Kamer na Hulanda, esta partido D66.

Remarcabel ta cu atrobe e imagen eroneo ta wordo treci dilanti como sifuera cu AVP lo tin un sosten amplio na Hulanda y cu e KB poni den luna di juni 2014 lo ta cuestionabel.

Acumulacion di debe
Loke e parlamentario no ta bisa mes ta e hecho cu Tweede Kamer den su totalidad ta riba e mesun linia. E realidad ta Tweede Kamer a expresa su mes na un forma basta critico y ta comparti e opinion cu mal maneho financiero a tuma lugar na Aruba. Partidonan VVD, PvdA y SP a duna apoyo na Minister Plasterk y nan ta di acuerdo cu e aanwijzing cu a wordo poni. E unico cu a expresa critica tawata D66 cual ta e partido cu AVP ta purba leun riba dje awor. De facto 3 di e 4 partidonan a duna un sosten amplio pa loke ta pasando relaciona cu e finansa publico di nos pais. Den e reunion Minister Plasterk a enfatisa entre otro cu un maneho financiero balansa ta di sumo importancia y cu den caso di Aruba el a sali for di man pasobra nos debe nacional a keda acumula so y no tin tendencia di baha.

Situacion penoso
E partidonan cu representacion den Tweede Kamer a comparti e preocupacionnan treci dilanti door di Plasterk y cada un cu nan propio argumentonan a defende e accionnan tuma door di Gobierno di Reino. Durante e reunionnan varios expresion a wordo haci entre otro cu ta e Hulandes Europeo ta esun cu ta carga e riesgonan pa e otro paisnan den Reino y cu e paisnan autonomo no ta duna contenido na nan responsabilidad. Netamente pa e tipo di expresionnan aki nos di oposicion ta lamenta cu 5 aña di gobernacion di Gabinete Eman na un forma iresponsabel a hiba cu awendia na e situacion penoso aki ta tumando lugar. E expresion haci door di e miembro di Tweede Kamer - pa con duro cu e por zona - ta enfatisa cu e ta nos responsabilidad pa tin un maneho financiero aceptabel sin cu nos ta of por perhudica otronan.

Preocupacion
E miembro di Tweede Kamer Bosman a declara cu “como pais bo mester asumi bo responsabilidad pa despues bo no tin preocupacion di nada y si acaso bo no haci esaki bo lo haya un aanwijzing”. Miembro di SP van Raak a bisa cu “tur miembro di Tweede Kamer sa cu pa añanan cu e situacion no ta bayendo bon na Aruba. Un otro miembro di Tweede Kamer representando PvdA, van Laar a expresa cu e ta decepciona cu gobernanetenan no a tene nan mes na palabracion di e “plafond” di gastonan siendo cu Minister di Finansa a garantis’e cu e lo ta esun acordando cada un gasto di pais Aruba.

Desaprobacion
Mester enfatisa cu no ta solamente Hulanda pero nos di oposicion for di promer instante caba a cuminsa señala cu nos finansa publico no ta bayendo bon. Ehempel di esaki tawata e rapport “Feestvierend ten ondergaan” cual a duna un analisis extensivo di tur loke tawata bayendo robes. Nos semper a vocifera y a urgi gobierno pa hiba un maneho responsabel, optimal y eficiente pero lamentablemente nan a scoge pa ignora y bay linea recta destruccion. Pa conclui, ta obvio cu Hulanda a desaproba e maneho financiero por completo y no a dal niun paso atras for di e momento cu a dicidi pa un KB. Pesey e ta ironico ora cu lider di fraccion di AVP kier crea un imagen como sifuera ta conta cu sosten amplio di miembronan di Tweede Kamer pa loke ta trata e “involucracion” di Hulanda siendo cu nan no tin apoyo mes!

Expresionnan haci den e articulo aki no necesariamente ta refleha opinion di ArenaPoliti.co