E ley pa adapta e presupuesto 2014 (=presupuesto supletorio, apresupuesto adicional of presupuesto ahusta) a drenta Parlamento y lo wordo trata dentro di poco. Aunke tur aña gobierno ta presenta un presupuesto supletorio na fin di aña, e aña aki ta obviamente diferente cu tur loke a sososde durante di e aña aki. E ley di presupuesto adapta aki ta contene tur e recomendacionnan di e “Comision di CFT di Corsou y Sint Maarten”. Gobierno a tuma tur e recomendacionnan y Raad van Advies a duna conseho positivo pa trata e presupuesto den Parlamento. Awor cu e “bululu” rond di e presupuesto 2014 ta parce di yega su fin, ta interesante pa wak ken y cua fraccion ta bay vota contra di e ley aki. Ban wak si e ley aki ta contene tur e “medidanan” cu oposicion di e coalision MEP/PDR den conhunto a prognostica. Loke en todo caso e ley di presupuesto ahusta 2014 ta ensera ta un suma di mas cu 170 miyon florin pa hisa e cobertura di e pensioen di empleadonan publico di biaha na 100% y un suma di miyonnan pa yuda cubri e seguro medico pa henter pueblo. E sumanan grandi aki cu ta surpasa 200 miyon florin cu gobierno tin cu bay fia, ta hisa e deficiet e aña aki na 9.3%. Otro aña e deficiet lo baha te na e nivel di e norma europeo di 3%. Un norma cu hopi paisnan europeo mes no ta cumpli cun’e ainda.

MANEHO FINANCIERO
E echo cu e recomendacionnan di CFT a wordo inclui casi completamente den e presupuesto supletorio 2014, ta bisa cu e raport di CFT en realidad no a trece mucho cos nobo cu ya no tabata conoci. E desaster cu oposicion di PDR/MEP a prognostica no a resulta di ta berdad. Al contrario. E deficiet di 9.3% riba presupuesto e aña aki ta resultado directo di e insistencia di  e “Comision di CFT di Corsou y Sint Maarten” pa inclui henter e suma di mas cu 170 miyon florin mes ora den e presupuesto. E alternativa lo tabata pa haci esaki over di un periodo di algun aña. Sigur si wak cu e tempo cu e fondo di pensioen tin pa recupera su perdidanan di e crisis y yega na 100% cobertura, ta core te 2029. Pero esaki ta sosode ora insisti den cifranan bunita enbez di hiba un maneho balansa pa sigura desaroyo di henter pais y tur sector. E maneho di CFT ( “Comision di CFT di Corsou y Sint Maarten”) ta e maneho financiero miskino cu e partidonan PDR/MEP ta boga p’e y a defende henter aña. E partidonan MEP/PDR mes no a presenta un maneho of sikiera algun idea cu ta mas na fabor di Aruba y pueblo. E dos palabranan cu mas ta den nan mente y nan vocabulario ta “medida” y “CFT”. Awor ban wak si nan ta aproba e presupuesto cu ta inclui e recomendacionnan di CFT of cu nan ta bay contra. Ban wak si e coalision di PDR/MEP ta vota contra pa sigui sigura tur hende na Aruba e cobertura di AZV cu nos tin. Ban wak si e coalision PDR/MEP ta vota contra pa e cobertura di pensioen pa empleadonan publico y maestronan di scol yega 100% e aña aki. Obviamente e “careda di bina no a caba ainda….”. 

Expresionnan haci den e articulo aki no necesariamente ta refleha opinion di ArenaPoliti.co