MEP a vota contra di e presupuesto pa paga nan salario! 

Contra tur expectativa e fraccion di MEP, of esunnan cu a bay traha e dia ey, a vota contra di e presupuesto di Parlamento pa 2016. E presupuesto aki ta ensera tur e gastonan di parlamento di Aruba pa henter un aña. E parti mas grandi di e presupuesto ta pa cubri gastonan di personal di Parlamento y di miembronan di Parlamento. Pero e ta cubri tur gastonan di coriente, telefon, transmision di radio y television, etc. Sin un presupuesto aproba, no por paga e gastonan aki. Tampoco e salario di e personal of di e miembronan di Parlamento. E comision cu a traha riba e presupuesto ta consisti di e lidernan di e tres fraccionnnan den Parlamento, e Presidente di Parlamento y personal financiero di Parlamento. Sra. Evelyna Wever-Croes di MEP nunca a presenta na e reunionnan aki. Durante di tratamento di e presupuesto e no tabata tin niun remarca riba e presupuesto mes. Un fout di administracion cu tabata tin den e presupuesto a wordo saca afo durante di e reunion mes. Pero na ora di vota e miembronan di MEP cu tabata den sala a vota contra di e presupuesto. Mes ora a surgi e pregunta ta con ta paga nan salario fin di cada luna, si nan no ta bay traha y ta vota contra di e presupuesto pa paga nan salario.

PRESENTA PA TRABOU
Aunke no tin un areglo di "no work no pay" pa miembronan di Parlamento, lo bo spera cu nan tin e sentido di responsabilidad pa cumpli cu nan deber di cumpli cu e funcion di representante di pueblo y traha pa e placa cu pueblo ta paga nan. E miembronan di e partido MEP a mustra e ultimo añanan cu nan no tin cunes! E sentido di responsabilidad no tey! No ta importa nan tampoco cuanto pueblo ta keha di nan comportacion irresponsabel, no ta importa nan cu ta trahadornan di Aruba ta paga nan salario y no ta gana loke nan ta gana na salario. Tog e miembronan di MEP no tin cunes. Nan no ta presenta pa trabou y ta usa un sin fin di excusa barata pa no traha.

VOTA CONTRA
E fraccion di MEP a haci'e un custumber di vota CONTRA di tur cos. Nan a vota contra di apertura di e refineria. Nan a vota contra di e pensioen general pa trahadornan den sector priva. Nan a vota contra pa salba e fondonan di pensioen di mas cu 20 mil pensionado. Nan a vota contra di e placa extra cu gobierno ta duna tur e trahadornan y pensionadonan (="reparatietoeslag"). Nan a yama esakinan malgastamento di placa cu a crea debe. Nan a vota contra di renobacion di hospital, renobacion di centro di ciudad y construccion di e vierbaansweg di San Nicolas pa Playa, inversionnan den enseñansa y den cuido medico. Nan ta contra AZV y contra pa haci Aruba mas independiente di energia di petroleo. Awor nan ta hasta contra di e presupuesto pa paga nan propio salario. Esaki a haci cu tin un problema serio awor. Esta cu ta puntra ta con ta bay paga e salario di e miembronan di MEP pa henter otro aña.

Expresionnan haci den e articulo aki no necesariamente ta refleha opinion di ArenaPoliti.co