Gonzalo Gonzalez, funcionario di Embahada Ecuatoriano

Durante e bishita di Embahador dr. Miguel Calahorrano-Camino, staciona na Hulanda, cerca Prome Minister Mike Eman el a wordo compaña pa Gonzalo Gonzalez, Director di Relacionnan Bilateral y Multilateral cu Europa di Embahada Ecuatoriano.

Gonzalez den su declaracion duna a mustra confiansa cu por yega na un acuerdo cu ta beneficia ambos pais, ademas cu el a expresa palabra di elogio pa Prome MInister Mike Eman riba maneho sostenibel.

Segun Gonzalez, e reunionnan cu a bin ta tumando luga den e dianan aki ta den e fase caba pa pone den ehecucion un palabracion cu tin entre e gobiernonan di Aruba y Ecuador. Ta trata di un palabracion general cu ta duna nan e caminda pa sigui bay dilanti cu e trabounan cu a bin ta haciendo.

El a splica cu loke kier logra cu e reunionnan, ta identifica temanan specifico, entre otro relaciona cu cooperacion, educacion, salud y comercio cu ta permiti Ecuador y Aruba traha hunto pa e relacion entre e dos paisnan wordo fortalece. "Aruba ta interesante pa Ecuador pa varios motibo. Pa cuminsa aworaki no tin relacion di cooperacion y esey ta permiti e dos bandanan busca forma pa traha hunto. Na di dos luga, Aruba ta ubica den area di Caribe y entrante 15 di januari e Presidente di Ecuador lo presidi e organisacion CELAC, cu ta un organisacion di Latino America y Caribe. Aunke Aruba no ta parti di e organisacion, Ecuador ta consciente cu e isla tin bon amistad cu paisnan di e area y ta permiti Ecuador haya acceso na otro paisnan. Di otro banda, Aruba tin algun necesidad cu Ecuador por yuda cune, entre otro productonan agricula y di conocemento, generando relacion bilateral cu ta beneficioso pa ambos pais," el a duna di conoce.

Un di e temanan interesante pa Ecuador ta e vision di Gabinete Mike Eman II di hiba un maneho sostenibel. Ecuador, el a bisa, tin un bon impresion di e trabou cu e Gobierno y Prome Minister di Aruba ta haciendo, principalmente e defensa di medio ambiente. Ecuador tambe ta den proceso di cambio den e uzo di e forma di produci energia. Nan principal material tabata combustibel fosil deriva di petroleo y ta tratando di cambia esey pa energia produci via di un sistema hydro-electrico, cu ta un forma limpi y barata pa Ecuador. Ademas, henter e iluminacion di e pais ta consisti di bombiyonan LED. 'Esaki ta yega cerca di nos na tur loke ta wordo haci na Aruba pa proteccion di medio ambiente."

Un relato cu ta bay wordo traha ta bay pa institucionnan di Aruba y Ecuador, pa studia cual ta e areanan specifico di cooperacion cu ta beneficioso pa ambos pais. 

Expresionnan haci den e articulo aki no necesariamente ta refleha opinion di ArenaPoliti.co