Un iniciativa di Prome Minister Mike Eman

Poco poco ta yegando e punto pa Aruba firma un acuerdo di cooperacion bilateral cu Ecuador riba diferente tereno. E siman aki tabata di bishita cerca Prome Minister Mike Eman e Embahador di Ecuador na Hulanda, dr. Miguel Calahorrano-Camino, kende a bin Aruba riba un bishita di "follow-up" sperando di por concretisa diferente detaye  pa Presidente di Ecuador firma un acuerdo cu Prome Minister Mike Eman.

Embahador Calahorrano-Camino a keda tres dia Aruba y a bishita institutonan cu cual por yega na un cooperacion cu nan. El a bishita tambe Prome Minister Mike Eman, kende a tuma e prome paso den e direccion aki na aña 2012.

Den e encuentro cu e mandatario, e Embahador a duna un relato den terminonan general di e reunionnan cu tin na Aruba cu tin como meta amplia y profundisa e relacion bilateral entre Ecuador y Aruba.

E ta un proceso cu tin tres aña andando, cu varios reunion cu a trece e partidonan mas cerca di otro. Un prome paso importante ta cu a firma un convenio cu tin e meta pa promove un serie di actividad den diferente sector entre Ecuador y Aruba. E convenio aki a wordo firma na december di 2012 door di Prome Minister Mike Eman y Embahador di Ecuador staciona na Hulanda. E convenio ta papia di cooperacion, intercambio, ayudo mutuo cu tin di haci cu industria alimentario, asunto di salud y educacion, di energia, etc. Un convenio basta amplio.

Segun e Embahador, ya caba ta den e fase di concretisa e ultimo detayenan, dunando e MOU un forma mas concreto cu algun serie di proyecto cu definitivamente kier promove. Den cuadro di esaki ta trahando riba e detayenan pa un reunion cu ta bay tuma luga entre Prome Minister Mike Eman y e Presidente di Ecuador. "Esaki lo mester tuma luga e aña aki ainda y e firmamento tambe," Embahador Calahorrano-Camino a duna di conoce. "Definitivamente nos kier amplia y profundisa nos relacion riba diferente tereno. Mi por menciona atencion medico, turismo, intercambio comercial riba productonan basico di alimento. E ta un convenio cu un "win-win situation". Nos ta fuerte riba algun tereno y Aruba riba otro terenonan, y nos por siña di otro. Nos ta busca pa cooperando bay dilanti na beneficio di nos pueblonan," e Embahador a bisa.

Un di e encuentronan cu a tuma luga tabata cu AZV. Segun, Calahorrano-Camino, e motibo ta pa nan por compronde miho cual ta e necesidadnan di Aruba riba tereno di atencion medico. Lo kier yega na un formula unda por yuda otro riba tereno di salubridad. Pero tambe a reuni cu autoridadnan di turismo. "Ecuador tin hopi di siña riba tereno di turismo for di Aruba. Nos kier yega na un cooperacion cu e Minister di Turismo cu ta beneficia nos tambe y igualmente den un intercambio comercial."

Den e aspecto di turismo, el a señala cu ta studiando e posibel apertura di un ruta aereo directo for di Ecuador pa Aruba. E ta spera cu esaki ta algo cu por keda concretisa e y "ora cu esaki bira realidad, otro portanan ta habri pa manera intercambio comcercial, cientifico, tecnico, etc."

Expresionnan haci den e articulo aki no necesariamente ta refleha opinion di ArenaPoliti.co