KI MISHI UN PARLAMENTARIO DI AVP TA BAI SCOL DI POLIS?

Clariska Velasquez, parlamentario di AVP, ta sinta den Parlamento de vez en cuando, esey ta si e no tin scol pa atende. Pasobra desde ya algun luna Clariska a drenta opleiding na scol pa polis, y manera ta resulta awor, esaki ta contra tur clase di conseho.

Tur conseho a indica cu un polis cu no ta activo, no tin derecho di bai opleiding. Laga opleiding pa esnan cu ta activo den Cuerpo Policial, esnan cu ta traha dia aden dia afo y pone nan bida na peliger. 

E nombracion di Clariska den e opleiding aki a causa masha hopi rabia den comunidad, pero especialmente den Cuerpo Policial, pasobra tin otro hende, mas cualifica cu Clariska, cu mas derecho cu Clariska, cu mester a keda afo di e opleiding pa Clariska drenta. Esaki ta un abuso!

Clariska mester tuma honor na su mes, awor cu e consehonan aki a wordo publica, y mester retira di Parlamento.

Clariska ta pone integridad di henter Parlamento den duda cu e actonan aki, pasobra ta mustra cu Parlamento p'e ta solamente un pasa tiempo, siendo cu trabou di parlamentario ta un trabou full time, y no tin tempo pa bai scol.

Locual ta mas cuestionable ta cu e Presidente di Parlamento nunca a comenta riba esaki, pero si cada biaha ta comenta ora tin parlamentarionan di MEP cu no ta presente na reunionnan. Cu esaki e imparcialidad di e presidente di parlamento tambe a keda comproba.

Expresionnan haci den e articulo aki no necesariamente ta refleha opinion di ArenaPoliti.co