Den Haag – Na Gabinete di Aruba a tuma lugar un encuentro na ocacion cu dia 14 di november ta dos aña cu Alfonso Boekhoudt a huramenta como Minister Plenipotenciario di Aruba na Hulanda. Un momento especial unda e mandatario – conhuntamente cu e personal di Gabinete di Aruba y ATA Europa - por a mira atras riba su di dos aña na Den Haag y alabes papia tocante e retonan pa e siguiente aña.

Sr. Boekhoudt a cuminsa na bisa cu e prome aña a dedica na expone e posicion di Aruba como hub entre Europa y Latino America. E mandatario a bisa cu e aña cu a pasa a concentra hopi riba e maneho di Gobierno ariba e tereno di sostenibilidad. Den cuadro di esey a tene e Green Aruba Pre-event e aña aki y a co-organisa un evento riba e tema aki cu TNO di Hulanda.

Pa loke ta Gabinete di Aruba a mira cambio principalmente den departamento di enseñansa. Desde e aña aki e mentornan ta duna guia unicamente na e studiantenan den nan prome aña. E guia di e otro studiantenan ta cay directamente bou di Gabinete di Aruba.

Un otro aspecto cu a bin ta haya atencion di Gabinete di Aruba ta ayudo na nos Arubianonan na Hulanda. ‘Un caso special tabata esun di Mitch Henriquez, unda Gabinete di Aruba a brinda sosten na e famia unda cu nos tabata por. Mi a ricibi hopi reaccion positivo ariba e acercamento aki cu ta duna mi satisfaccion pa loke ta e trabao cu nos como Gabinete ta haci’, asina sr. Boekhoudt a bisa.

‘Otro aña lo bira uno cu un aspecto excepcional. Nos ta celebra 30 aña di Status Aparte. Un momento pa nos mustra con nos a yega asina leu. Trinta aña di Status Aparte den cua nos por ta liber pa expresa nos propio identidad y e aspectonan cultural importante pa nos. Aspectonan tambe cu ta haci nos orguyoso como Arubiano’, asina sr. Boekhoudt a bisa.

E mandatario den su discurso a gradici tambe ATA Europa den nan logro pa trece mas turista Europeo na Aruba. ‘Tambe mi ta hopi gradicido pa e cooperacion estrecho y positivo cu ta existi entre ATA Europa y Gabinete di Aruba.’

Finalmente Minister Boekhoudt a gradici tur esnan presente pa asisti na e encuentro special aki den cuadro di su di dos aña como Minister Plenipotenciario di Aruba na Hulanda. ‘Nos como Gabinete y boso como functionario a mustra di por maneha e tarea cu Aruba ta pidi nos pa haci. Mi ta hopi gradicido na boso pa e bon sosten cu mi a ricibi e ultimo aña aki y mi ta spera di por conta riba esaki pa e aña cu ta bini.’

Expresionnan haci den e articulo aki no necesariamente ta refleha opinion di ArenaPoliti.co