Den e rapport di e investigacion cu Algemene Rekenkamer Aruba (ARA) a haci riba e Cuenta Anual di Pais Aruba pa 2013 a keda constata cu Gabinete Eman no a cumpli cu su mesun plannan pa drecha e finanzas publico di nos Pais.

Riba pagina 4 di e rapport di ARA nos por lesa cu ARA ta constata cu gobierno no a logra cumpli cu e diferente marconan financiero cu e mes a presenta. Ya caba ora di compila y despues cambia e presupuesto ta desvia di e marconan financiero presenta. E desviacion ta ainda mas grandi si e cifranan realisa wordo compara cu e marconan financiero aki. Riba pagina 27 te cu 32 ARA ta brinda informacion detaya di e desviacionnan aki.

Locual cu ARA ta trece dilanti ta e hecho cu Gabinete Eman na tres ocacion ta desvia di su mesun plan y palabra. Na promer instante Gabinete Eman na 2010 a presenta un cuadro financiero den cual nan a bisa cu cada aña nan lo baha e deficit presupuestario di nos Pais door di baha gasto cu 75 miyon florin. Pero Gabinete Eman no a tene su mes na su palabra y a presenta presupuestonan cu no ta cuadra cu e cifranan presenta den e cuadro financiero. Na segundo lugar Gabinete Eman ora di trata e presupuesto den Parlamento a bin cu Nota di Cambio pa cambia e presupuesto y asina a desvia mas ainda di e cuadro financiero. Y na tercer lugar, ora di compila e Cuentanan Anual a keda constata cu tin desviacionnan aun mas grandi entre e cifranan real y esnan di e cuadro financiero presenta pa Gabinete Eman.

Mester remarca cu e cifranan di e cuadro financiero di 2010 a wordo adapta na 2013, pero asina mes Gabinete Eman a desvia di e cifranan aki. Na 2014 tambe a bin cu un plan nobo, e Acuerdo di Balanced Budget, pa tene e gastonan na e nivel di Presupuesto 2013 cual ta 1350 miyon florin. Pero ta conoci caba cu Gabinete Eman no a tene su mes na su mesun palabra y den presupuesto 2014 a surpasa e nivel di gastonan proponi den e Acuerdo di Balanced Budget.

Pues for di e rapport di ARA ta bira bisto cu Gabinete Eman no por a cumpli cu e plannan irealistico cu nan mes a presenta.

17 november 2015

Expresionnan haci den e articulo aki no necesariamente ta refleha opinion di ArenaPoliti.co