Sigur pa locual ta e maneho di finanzas publico di nos Pais nos por constata cu Gabinete Eman no ta serio. Constantemente e Ministernan ta purba papia bon locual bo no por papia bon. Enves di duna un splicacion of contesta serio riba preguntanan haci relaciona cu presupuesto 2016, bo ta haya e mayoria Minister di Gabinete Eman ta desvia atencion criticando opocicion y cuestionando e 8 aña di gobernacion di MEP. Asina aki como mandatario bo no ta mustra seriedad den gobernacion.

Baha deficit artificialmente

E ta un berguensa pa scucha algun Minister y hasta Parlamentario di AVP papia di e deficit cu a ser baha, siendo cu cifranan di Banco Central y rapport di CAFT ta mustra net lo contrario. Enves di baha, Gabinete Eman a hisa e deficit y cada ves cu presenta un presupuesto ta purba bahe pa presenta un presupuesto cu ta cumpli cu norma pa un deficit manehabel. Pero en realidad despues di algun luna caba e cifranan di Banco Central ta mustra nos cu e deficit ta hopi mas grandi cu locual Gabinete Eman a presupuesta.

Mas manipulacion y mentira

E ta un berguensa cu Gabinete Eman ta recuri na tanto manipulacion y mentira enves di atende na un manera serio cu gobernacion di nos Pais. Pasobra si bo tin deficit grandi, si bo no a corta den gasto manera mester ta, si bo entrada ta keda atras, con bo por baha e deficit di nos Pais asina? Como gobierno bo no por keda bende edificio, exonera debe di gobierno y privatisa departmento di gobierno. Pasobra ya caba Gabinete Eman ta bende 8 edificio di gobierno den cual hasta tin un monumento, a exonera debe di gobierno na SVB y APFA y awor ta privatisa laboratorio nacional pa asina artificialmente baha gasto di gobernacion di nos Pais.

Gobernacion ta algo serio

Goberna un Pais ta exigi seriedad di parti di nos gobernantenan. Ora bo ta un gobernante serio bo no por recuri na manipulacion y mentira pa tapa e berdad amargo pa e Pueblo. Wega politico tur hende por haci, pero un dia bo ta topa bo mes cu e muraya di e berdad cu bo no por goberna asina. Un gobernacion na beneficio di un Pueblo y e generacion nos dilanti, ta exigi seriedad cu te ainda Gabinete Eman no por demostra.

2 februari 2016

Expresionnan haci den e articulo aki no necesariamente ta refleha opinion di ArenaPoliti.co