Mirando cu ultimo dianan nos a bin ta informando nos pueblo y mirando cu di parti di Minister di Salud nos no ta hañando informacion tocante e presencia di e virus Zika den nos region y door di falta di informacion, nos di Movimiento Electoral di Pueblo a dicidi di actua y asina trece poco informacion pa nos pueblo.
E virus aki ta wordo transmiti door di e sangura Aedes Aegypti, cual ta e mesun sangura cu ta transmiti Dengue y Chikungunya. E virus ta wordo transmiti ora e sangura pica bo. Ta bon pa tene na cuenta cu e sangura ta pica den dia y ta e sangura muher ta esun cu ta pica y ta transmiti e virus. E sangura aki ta broei den awa limpi. Locual ta hopi importante pa sa ya cu asina nos por tuma tur prevencion necesario.
Si nos controla pa no tin awa manera den potchi mata, botter of cualkier lugar na unda awa limpi por para, e ora nos lo evita pa e sangura reproduci y consecuentemente nos lo elimina e sangura.
E sintomanan causa pa e virus transmiti door di e sangura aki ta: keintura leve, dolor di cabes, conjunctivitis y rash na bo cuero compaña pa dolor.
Un di cada 4 persona lo presenta e sintomanan aki. E problema mas grandi cu tin cu e infeccion aki ta, complicacion neurologico, damanan na estado, specialmente durante e promer tres lunanan di nan embaraso nan por haña yiunan cu microcefalia, es decir, desaroyo abnormal di e cerebro, ya cu e cerebro no ta crece y ta keda chikito. Fuera di esaki tin hopi chens pa haña un complicacion grave cual ta Guillan Barre, malesa autoinmuno cu ta afecta bo celnan nervioso y cu por ta fatal.
Awe nos ta mira cu WHO (World Health Organisation) a emiti un alerta mundial pa cu e menasa di Zika. Lamentable ta pa mira cu aki na Aruba nos no ta tende nada di e persona encarga cu salud publico di e pais aki. E unico manera pa combati e malesa aki ta prevencion y sin duda elimina e sangura. Sin sangura no tin infeccion. Laga nos lo por mira un accion activo di e ministro encarga cu salud y bin cu campaña di informacion na e comunidad y asina nos alerta e pueblo y evita casonan fatal riba nos isla. Ban haci uso di repelente y caba cu e criaderonan. Nos poblacion mas vulnerable, esta nos muchanan, nos grandinan y principalmente e damanan na estado lo por wordo afecta.
Si nos mira cu Colombia tin 22000 caso registra y lo tin un calculo di 600000 caso, Venezuela cu un cantidad di caso importante, Brazil cu 350 caso di Guillan Barre confirma, ta mas cu logico cu den e dianan venidero nos lo por wordo confronta cu e virus aki riba nos isla y no lubida cu nos tin e sangura aki na Aruba! Pesey mi ta insisti: preveni ta mihor cu lamenta!
Y den cuadra di prevencion nos partido MEP a entrega un mocion na unda fraccion di MEP den Parlamento ta urgi e ministro encarga cu salubridad publico pa pone e debido atencion na e asunto aki di e virus Zika.

Expresionnan haci den e articulo aki no necesariamente ta refleha opinion di ArenaPoliti.co